Hizbul Mujahideen tekolakba Syed Salahuddin’er jabaso puogo

New Delhi, October 24 (Agencies): National Investigation Agency-i Mongulbarnü Hizbul Mujahideen tekolakba Syed Salahuddin’er jabaso Shahid Yousuf, New Delhi nung puogo. Pa ya Jammu and Kashmir nung kiralongrar tem senotsü teyari agütsüa yariba dak sendakba nung NIA-i bushisüngdangba nung ajemdaker apu.
Pa mapu tsüngda arishi küm 42 tain Yousuf ya NIA-i keno ashishiteptsü asoshi jaoka liasü.
Osang ka ajanga ashiba agi, Yousuf ya Jammu and Kashmir sorkar kübok Horticulture department nung mapa tinyakdak lir. Pa ‘hawala’ ajanga sen lakh 3.4 agizükba atema Mongolbarnü puogo.
Ketdangsertemi ashiba agi, pai iba sen ya 2011 nungi 2014 tashi nung installment tenet ajanga agizük. Yousuf-i iba sen ya Aijaz Bhat nungi agizüka shiba Saudi Arabia-i jena or lir. Agency ajanga ashiba agi, Shahid ya Bhat den sendaktepa aliba India nungertem rongnungi ka lir, shiba pa den telephone ajanga sen belenshitsüba code agüzüktsüba atema tongtepratepa liasü.
‘Hawala’ inyakyim densema Kashmir nung kiralongrartem nem ozüng alema teyari agütsüba dak sendakba nung NIA puri bushisüngdangdar. Parnoki iba dak sendakba nung ken o aika benoka lir.
2011 April ita NIA pur ken o benokba ya Pakistan nungi Jammu and Kashmir-i Delhi ajanga Hawala channel nungi sen belenshiba dak sendaka lir, koba kiralongraba maparen nung teyari agütsütsüba atema asütsü, ta temolung melemi bilemer.
NIA pur tang tashi nung nisung trok anema charge sheets ana benoka lir koba nung GM Bhat, Mohammed Siddiq Ganai, Ghulam Jeelani Liloo aser Farooq Ahmed Dagga nunger densema lir. Parnok pezüprongla ya tepokdak liasü. Parnok den külemi ano Mohammed Maqbool Pandit aser Aijaz Ahmed Bhat anemaa NIA-i ken o benokogo saka tenaprongla jenaoadokogo. Interpol Red Corner notice ka dena anema benokogo.
Yousuf tebu Mohammed Yusuf Shah, shiba ajaki Syed Salahuddin ta ang tejangjaba meteta lir, pa ya June ita US State Department-i kiralongrar ka ta sangdongogo.
Pa ya United Jihad Council tekolakba lir. Iba telok nung LeT aser JeM nunger amala telok densema lir, shirnok Pakistan aser Pakistan-i mekaa aliba Kashmir nung mapa inyaker.