Hockey: Australia teloki India tsükdaktsü

Melbourne, November 23 (Agencies): Rupinder Pal Singh-i goal 2 tashi agüja, kanga junga asayabaren ajunga amajok küma, par India teloki Australia kübok Melbourne nung asayaba four-nation Invitational Tournament hockey asayamong asaya nung tanü, Bodbar nü tamakok nguogo.
Malaysia aser New Zealand telok densemba hockey asayamong nung Australia teloki goal 3-2 agi India telok madak takok ngua liasü.
Tanü asaya tenzüker minute 21 buba nung Rupinder-i 1 buba goal agüja, par India telok temaba jenjang nung ajungkettsü saka minute 3 shi süir külen Australia nunger Jeremy Hayward-i goal-ji meyipja, par telok anaprongla kasa jenjang kümdaktsü.
Hayward-isa minute 36 buba nung penalty corner goal agütsüba sülen külem sensopur, Trent Mitton-i minute 43 buba nung 3 buba goal agüja, par Australia telok goal 3-1 agi India den temaba jenjang ngudaktsü.
Tesülen, Rupinder-i minute 53 buba nung goal agüja, par India telok jenjang tajungba kümdaktsü saka tanüngba asaya mapang nung par teloki tanüngba goal 1 memeyiptsüteti tanü tamakok ajurua liasü.
India teloki par taruba asaya Malaysia telok den tan Brehostibar nü asayatsü lemzüka lir.