Hockey India-i Vidya Stokes nem Life President naroküm agütsür

New Delhi, November 02 (Agencies): Hockey India (HI)-i tesüiba HI Tir, Vidya Stokes nem par Life President ama züngshitsü naroküm tanü Hombar nü agütsüogo.
Tanü amenba 5 buba Hockey India Congress senden nung Stokes HI telok nung Life President ama züngshitsü lemtetba osang jangjaogo.
HI temzüng kübok arla 5.14 nung ajemdaker tang Himachal Pradesh nung Irrigation & Public Health Minister, Stokes nem iba naroküm ya agütsür lir.
HI Executive Board aser Congress senden ajunga nung shilem agitsü temeten agütsüaka, Life President mendenji tenüng agi dang alitsü asoshi HI temzüng nung lateta lir.
“Stokes-i HI rendaktsütsü asoshi mapa tajung jenti inyakogo aser iba yongji la nem HI Life President naroküm agütsür,” ta HI Tir, Narinder-i metetdaktsü.
1970 küm nungi tenzüka Indian National Congress nung züngsemla, Stokes-i 1984, 1988, 1995 aser 2003 nung tan anenadoker aliba Indian Women’s Hockey Association (IWHA) Tir inyakba osang bushiteta lir.
HI nung Tir inyaktsü asoshi 2009 küm shimla, Stokes-i tang minister menden abenba den külemi, Hockey Himachal nunga Tir menden bena lir.