Hockey India lenisang, Batra FIH Tir shimogo

Dubai, November 12 (Agencies): Hockey India (HI) Tir, Narinder Batra International Hockey Federation (FIH) Tir inyakdaktsütsü atema tanü, Honibar nü shimogo.
FIH nung Executive Board Member aser Asian Hockey Federation (AHF) nung Tatong Tir menden abensang, Batra-i tan Tir menden abentsü maongka anguba sülen taoba küm 4 tashi FIH Tir menden abensang, Leandro Negre melenzüka, FIH Tir tasenba akümtsü.
Tan November ita 10 nü nungi tenzüka tanü, Honibar nü tembangba FIH Congress senden nung shilem agirtemi Batra shimba osang angazükogo.
Batra-i vote 118 nungi ajak agi vote 68 tashi ajangzüka, vote 29 angusang, Ireland nunger David Balbirnie aser vote 17 ajangzüker, Australia nunger Ken Read na den temaba jenjang ngua, tan FIH Tir tasenba akümtsü temetenji ajangzüker lir.
“Ni FIH lenisütsü menden abentsü maongka anguba atema kanga pelar. Kü lenisüba kübok alima ajunga nung hockey jenjang taoba mapang nungi tajungba küma ajungkettsütsü alizüng lir,” ta India nunger rong nung FIH Tir menden abentsü temeten angur mezüngbuba akümsang, Batra-i metetdaktsü.