Hockey: India tsürtemi US den kasa jenjang nguogo

Manheim, July 21 (Agencies): America semdanga asayaba hockey asaya 2 buba nung India’er tetsür hockey teloki goal 2-1 agi America tsürtem madak takok ngua, America tsürtem den kasa jenjang yashi, Bodbar nü anguba osang jangjaogo.
Yashi asaya 1 buba quarter nung telok anapronglai goal magütsüi asayaba sülen 2 buba quarter, asaya tenzüker minute 19 buba nung Jill Witmer-i penalty corner takok ngua zükokja par America telok asoshi goal 1 agütsü.
India tsürtemia kanga meranga asaya aser 3 buba quarter nung Preeti Dubey-ia penalty corner goal agüja par telok anaprongla kasa jenjang kümdaktsü.
Yamaji asayaba sülen, 4 buba aser tatembangba quarter, asaya tenzüker minute 55 buba nung Lilima Minz-i goal 1 agütsüba yong par India teloki goal 2-1 agi America tsür madak takok nguadok.
Taruba August ita 5 nü nungi tenzüka Brazil nung asayatsü ayongba Rio Olympics atema terenemshiba agia asayaba 1 buba asaya nung America tsürtemi goal 3-2 agi India tsürtem madak takok ngua liasü.
India tsürtemi asüng, Hokolbar nü nungi tenzüka Canada tsürtem den Test asaya 4 tashi asayatsü renema lir.