Hockey Series: Australia teloki India akok

Victoria, November 30 (Agencies): Australia teloki goal 4-3 agi India madak takok ngua, par linük ana tsüngda asayaba asaya 2 densemba Hockey Series asaya tatembangba nung tanü, Bodbar nü shilem agiogo.
3 buba quarter asaya mapang talangba ka asayar 10 küma asaya aka, India teloki tanü kanga meranga asaya aser par asayar, Akashdeep Singh-i asaya tenzüker minute 6 buba nung 1 buba goal agüja, par India telok temaba jenjang nung ajungkettsü.
Ajisüaka, Australia nunger Trent Mitton-i minute 13 buba nung goal-ji meyipja, par telok anaprongla kasa jenjang kümdaktsü.
Tanabuba quarter asaya nung, asaya tenzüker minute 22 buba nung Captain V.R. Raghunath-i 2 buba goal agüja, par India maneni temaba jenjang nung ajungkettsü saka Jake Whetton-i minute 23 buba nung goal-ji meyipya, par Australia o India telok na sako jenjang tanaben kümdaktsü.
Raghunath-isa 3 buba goal agütsüba sülen par India telok temaba jenjang nung lia, asaya mezüngbuba shilem tembang.
Ajisüaka, asaya tanabuba shilem nung, asaya tenzüker minute 38 buba nung Jeremy Hayward-i penalty corner goal agüja, par telok anaprongla goal 3-3 agi kasa jenjang ngudaktsü.
Tatem nung Hayward-isa minute 54 buba nung 4 buba aser takokba goal agüja, par Australia telok nem takok ngudaktsü.
India-i yashi takok anguba aser Australia teloki tanü akokba ajanga par telok naprongi asaya kaka koka, par Hockey Series tembanga liasü.