Hokolbarnü NSCN-IM, CFMC office kima nung lungkak ait

Hokolbarnü Diphubar nung NSCN-IM, CFMC office kima lungkak aitba noksa nung angur.

Dimapur, December 4 (TYO): Brihostibar nikongtsütsü 4:30 ako meta NSCN-IM züngsem 3-i Eralibil yimtsüng nungi Garo nunger tantsür ka pur aoba sülen Hokolbar nikongtsütsü 1:00 ako meta la chiokogo.
Ali mechi nung mangatettep ken o ka atema parnoki tantsülaji pur aoba liasü saka tanü yimtsüng pungu longjemer tentetba Joint Council Forum (JCF)-i lungkak aitba sülen ang la chiok.
Iba tatalokba sülen Hokolbarnü Aoyimti, K Hollohon, Dubagoan, Eralbil aser Ekranipathar yimdaklirtemi tentetba JCF-i NSCN-IM, Ceasefire Monitoring Cell (CFMC) office-i ao aser tantsüla chioktsü takhangba agütsü.
Iba mapang tantsülaji CFMC office nung masü tanga tesem ka nung yua liasü aser tanü nikongtsütsü 1:00 ako meta lar kinünger ket nung la agütsü.
Tantsülai ashiba agi, lai Garo nunger apuani ta bilemer nisungtem dang lar kimung ka yokdok, ajisüaka tebursangjibo Tikhir nunger liasü.
Laibo tenaprongji Garo nunger ta dang bilem kechiyong tebursang jagi Garo nunger oshi kanga junga jembi, ta tantsüla-isa ashi.
Tetsüri senmangba kin asünung ali ayokba kulikaketji Tikhir nunger kinungtsü Garo tsürla tenüng nung yanglu, ta laisa shisem.
Mapang tatsüka lir külen Garo tsürla T H Sangma la dangi aru aser patta yanglutsü atema la indang sign nüngdaker ta ashi, aser lai mulunga sign asü. Ibaji ser külen ano Garo tsürla kinungbo NSCN-IM nungi Kuisomong (Among Tikhir ta-a ajar) la dangi aru aser paper ka nung tashiyim agi sign südaktsütsü merang, ta tantsülaisa metetdaktsü.
Tantsülai ali ayokba atema anaben tashi sign asütsü memulung aser lai NSCN(IM) UT office dangia phone ajanga jembi. Ajisüaka, Brihostibar nikongtsütsü NCSN(IM) züngsemtemi la pur ao.
Tanü JCF-i ashiba agi, parnok yimtsüng pungu telongtet nung ken o kar adokra, ibaji tangari masü saka bangdak council-i dang benoka angadangtsü.