Hollande-i Burkina Faso mitkar lenirtem aitsür

Paris, September 17 (Agencies): France Tir, Francois Hollande-i Burkina Faso mitkar lenirtem aitsüba olen ka tanü Brehostibar nü metetdaktsüogo.

Tesüiba mapang France yimsüsüba kübok densemba Burkina Faso nung presidential guard mitkartemi par yimsüsürtem yimsüsütsü menden nungi tashiyim agi anendaktsüba sülen parnoki Burkina Faso indang yimsüsütsü tashi benokba osang jangjaogo.

“Burkina Fasco mitkartemi tashiyim agi yimsüsütsü tashi benokba maparen kanga sashia aitsür. Ano, parnoki tashiyim agi pua yua aliba yimsüsür ajunga tekaraba mapang nung chioker külen election agia sorkar tasen shimtettsü ajungshir,” ta Hollande-i tanü sangoktsü.

Burkina Faso madak küm 27 tashi yimsüsüa arusang, Blaise Compaore yimsüsütsü menden nungi anentsür külen par linük nung democracy yimsüsütsü yimya benshia election agitsü hopta ishika anünga alidang tan mitkartemi par linük indang yimsüstsü tashi tashiyim agi benoker lir.

Yamaji inyakba ajanga Africa anülulentip tsütsü tenteba Burkina Faso linük nung tang makmakshimak tulu adoka tensa kanga mejungi akümba osang jangjaogo.

“Taoba Burkina Faso sorkar agienba sülen ‘National Democractic Council’ tasen ka tentetogo,” ta presidential guard lenir, Lieutenant-Colonel Mamadou Bamba-i national television ajanga alima dang sangoktsüba osanga jangjaogo.

Par linük nung ajaki shilem agiba aser timtem kecha majurui election agia sorkar tasenba tentettsü nükjidong nung telok ajunga den jembiteptsü tenzükba osanga Bamba-i tanü metetdaktsüogo.

Africa kübok Sahel region nung tentetba kiralongrartem anema raradaktsütsü nükjidong nung France-ia par mitkar züngsem 220 tashi Burkinabe yimtiba kübok Ouagadougou nung yuja lir.