Hollande-i Charlie Hebdo lendong nung asür nem aküm agütsür

Paris, January 05 (Agencies): France Tir, Francois Hollande-i yaküm Charlie Hebdo osangkaket adokdak aser kosher osettsüset ayokdak atalokba lendong nung asür bilemteta parnok nem aküm tanü Mongolbar nü agütsüogo.
Tir Hollande-i Islamist kiralongrartemi atalokdaktsüba lendong nung asür 17 nem aküm agütsüba den külemi, lendong atalokdak nüngshilunga tanü sayaja liasü.
Charlie Hebdo nung mapa inyakertemi yaküm 2015 küm January ita 7 nü senden ka mena alidang tongpang nung amshitsü prangpong abener Islamist kiralongrar anati senden mena alir rong nung injang kalokja amakba sülen parnok nisung 11 tashi kaset.
Yaküm asür kinüngertemi Hollande den külemi lungjemer asürtem nem aküm agütsüba sentong nung shilem agia liasü.
‘Ni Ahmed’ ta Frane linük wako sentsü agi lungnang nung züluja kiralongrar ana aputsü merangdang kasetba police ketdangser, asür Ahmet nema parnoki aküm agüja liasü.
Charlie Hebdo osang adokdak aküm agütsüba sülen Hollande-i maneni kosher supermarket semdanga idakji kaseta asür nisung 4 nema aküm agütsü.
Hollande-i tesülen asür kinüngertem den ajurutepa parnok den sasaba olen lemsatepa liasü.
Charlie Hebdo lendong atalokdaktsür rong nung kati yakümsa, January ita 8 nü kasetba police ketdangser, asür Clarissa Jean-Philippe nema tan Honibar nü aküm agütsütsü sentong Hollande-i renema lir.
Ano külen, yaküm küm tetenzüklen nungi tenzüka tanü tashi nung France nung lendong atalokdaktsütsü asoshi sentong atonger telok 11 apuba den külemi, kiralongratsü asoshi nisung anidener tentet 18 tashi samatsüba osang ka France Interior Minister, Bernard Cazeneuve-ia tanü metetdaktsüogo.
Islamist kiralongrartemi Paris yimti nung nisung 130 tashi tepseta yaküm November ita 13 nü lendong kanga sashia atalokdaktsüba sülen France nung tanga emergency ozüng benoka lir.