Hollande-i Modi dang auer jaogo; pai langzütsüla: Rahul

New Delhi, Rongjui/September 22, 2018: Tanü New Delhi nung Rafale deal ken o nung Congress Party Tir, Rahul Gandhi-i osangbenertem den jembiba noksa nung angur. Kasa noksa nung Congress Party otongdar, Randeep Surjewala-a angur.

New Delhi, Rongjui/September 22 (Agencies): Ato kilonser, Narendra Modi maneni aija tanü Congress Party Tir, Rahul Gandhi-i, taoba France Tir, Francois Hollande-i Rafale deal ken o nung Ato kilonser, Narendra Modi dang auer jaogo, ta shia Joint Parliamentary Committee kati France dang nungi fighter jets 36 alizükba ken o bushisüngdangtsüla, ta takhangba agutsü.
Taoba France Tir, Hollande-i, Rafale deal contract India nung nija company ka nem agutsüba nung France sorkari shilem agia mali, ta jembiba nung ajemdaker tanü Rahul Gandhi-i, iba onük nung Modi-i ola madokba atema aitsüba den Hollande-i jembiba oji shidak asü tai’ar jangjatsütsüla, ta ashi.
Rahul-i, “Tang France nung taoba Tiri ashibaji – India Ato kilonserji auer. Iba sangdong ajanga ibaji ashir. Ato kilonseri Hollande-i sangdongbaji shidak asü masüar jangjatsütsüji tongtibang aser Hollande-i shidak jembi asü tiyazü jembiar jangjatsütsüla,” ta ashi.
Gandhi-isa, “India nunger putiotsü nung tang mezüng taoba mapang Tir kati asen Ato kilonser ya auer ta shiogo, anungji Modi-i telangzüba agutsütsüla,” ta ashi.
“Iba tasüngdangba ya Ato kilonser office akhümket den sendaktepa lir, iba tasüngdangba ya defence, asen sepaitem, Air Force tarutsü tia den sendaktepa lir. Ato kilonseri ola madokba ajanga ni süngmanger. Iba sangdong dak sendakba nung Ato kilonser tebang nungi ola kata adoka mali. Iba nisung ya taoba mapang France Tir lir, aser Rafale deal contract yangluba mapang nung Ato kilonser dena jembia liasü,” ta paisa ashi.
Tamalen Modi-i pa ya linük “chowkidar” (tanüker) lir ta jembiogo, ajisüaka pai par medemer industrialist (Anil Ambani) nem sen crore 30,000 sempet agütsü, ta Congress Tirisa metetdaktsü.
“Asen Ato kilonser ya ochimashi, ta asenoki tejangja. Asen linük tanüker ya auer ta tangbo India nunger melungsentsü nung tasüngdangba akar,” ta paisa ashi.
Interview ka nung Hollande-i phone ajanga, “Ni iba (Rafale) onük nung Ato kilonser ana tiyongtsüi ia iba onük nung ni-a shilem aginer, ta ashi. Tamasabo iba tezüngzüktep ya (Rafale) tayimtsü 126 atema liasü. Ajisüaka sorkar melenshiba sülen India nungeri melenshia tayimtsü 36 dang akum. Ajisüaka manufacturing ji France nung asutsü atema sentong liasü. Iba nungji ajemdaker onoki külen takoksa angu, ajisüaka tangalen tajangzük angu,” ta ashi.
Rafale deal contract nung France sorkari shilem agia mali, ta metetdaktsüba dak sendakba nung tasüngdangba ka langzüdang Gandhi-i, “France sorkari inyakyim dak sendakba sangdongji agütsüogo,” ta ashi.
“Ato kilonser aser France Tir na tsüngda senden amen, aser iba senden nung contract sign asü. Taoba France Tir dang iba senden nungji, iba contract ji Ambani nem agutsütsüla ta ashi. Iba tenüng menük nungjagi asüngtettsü atema tang India Ato kilonseri inyaktsüla,” ta paisa metetdaktsü.
Gandhi-isa, pai Ato kilonser yaritsü meranga pa dang sangdong ka agutsütsü asüngdanger, ta ashi.
“Ni pa indang office akhümket kümzüka yuner, aser nüburtem dang Hollande-i jembibaji tiyazü ta sayuner. Ajisüaka tang tashi nai (Modi) o mejembiteter,” ta Rahul-i aitsü.
Modi Ato kilonser menden nungi anentsütsü atema akhangtsü asü?, ta asüngdangba langzüdang Gandhi-i, Ato kilonser kümzüka ayutsü atema minister temi yazü jembir, ta ashi.
Rahul-i ashiba agi, sen crore 526 agi Rafale tayimtsü alizüktsü atema taoba mapang Congress-i aniba UPA sorkari tezüngzüktep agia liasü, ajisüaka Modi-i aniba sorkari sen crore 1600 agi alizük.
Lanurtemi Modi dak teimla yua liasü, ajisüaka pai nenok aser defence sepaitem ket nungi sen agi; nenoki Ato kilonser dak tamang aka, saka pai ibaji raksatsü, ta Congress tongti, Rahul-isa aitsü.