Holy Cross Higher Secondary School küm 50 jungogo

Dimapur, April 16 (TYO): Dimapur nungi shisaluyimba reju tajungtem rongnung ka- Holy Cross Higher Secondary School (HCHSS) küm tenem jungogo.
Honibarnü Nagaland Home minister, Y Patton-i Hon jubilee sentong nung tongti tesemdanger ama shilem agia sentong lapoktsü.
Y. Patton ya HCHSS nung azünger ka lir aser tanü pai tongti tesemdanger o jembidang, HCHSS tenzükba nükjidong tongtetdaktsütsü atema merangtsü aser tali renloka aotsü atema maneni tenangzükba agia inyaktsü ayongzük.
“Iba reju lapoker küm 50 süia aruba atema pelatepdang,  asenoki tesüiba mapangtem meyipa reprangdi aser kechi nungsa metokmeperi inyaka lir metettsü merangdi aser tarutsü nung itemji metongshia inyaktsü atema shisadangdi,” ta Y Patton-isa tayongzükba agütsü.
School kaji shisaliok anguba reju ka dang masü saka life skills angazükdak ka asütsüla. Tesayurtemi kaket shisatsü agütsüba dang masü saka taküm dak sendakba tesayubatem agütsütsüla, ta paisa ashi.
Home Minister-isa taoba Principal, faculty member aser tsürabur ajak dang pelaba metetdaktsüdang, parnoki shilem tajung agiba ajanga tanü iba school noktaka lir, ta ashi.
Tanü sentong nungsa Y Patton-i jubilee nüngo sayatsü. Hon jubilee mung nung tetushi süa jaokertemji Parliamentary Secretary, Jacob Zhimomi aser Nagaland Bishop Rev Fr. James Thoppil na liasü.
1966 küm kaketshir 12 tenüng züluoka Holy Cross Higher Secondary School  tenzüka liasü, aser tanü school nung kaketshir 3189 enroll süa züngdar aser iba den külemi teaching staff 90 aser non teaching staff 20 lir.