Hombar Anepdang Deobar

Kechisarena inyakaka, ajakji Tsüngrem sentsüwangshi asoshi inyakang. 1 Korint 10:31
Deobar sentepji sarasademtsü, tushitsü aser tenüngsang agütsütsü asoshi senteper. Deobar sentep agiba amaji hombar nüa alitsüla. Deobar sentep nung Tsüngrem O angashiba jagi iba hopta tepiyong telok balala nung mapa inyaka alidang tashi itdaktsütsüla. Tekülemdak Tsüngrem O angazükba ne jakla ne mapa aser ne mapang anishidaktsütsüla.
Arogoi kechi inyaktsüla? Arogo, na aser ni mapa ajak, juri mapaa ajak, chiyongba aser ajemba, Tsüngrem sentsüwangshi asoshi inyaktsüla. Tanela nung tanga junga lidaktsütsü bilema, koba agi tangar yirutsür mesüra asenok atema dang bilemba aser inyakba yimya endoktsüla.  Asenok kati ka tenzüktsü asoshi Tsüngrem taochi agi asenok aja.
Khristan senso ka ama asenoki ozüng nung tashi angaa alitsüla aser lokti asoshi tajung inyaktsüla. Tsürabur ama tanurtem tazüokba aser Kibubai sayuba ozüng nung tashi angaa anitettsüla. Tanurtemi pei tsürabur dang akhüm tsübutsüla, aser libaliro, taküm yimya agi tsürabur mejashidaktsütsüla. Mapa inyakertemi mapa ajak ochi shia inyaktsüla aser takok tashi tajungtiba tenzüktsüla. Arogo züngsem ka ama arogo mapa renloka inyaktsü asoshi asen mapang, sen aser tashi agütsütsüla. Inyakba ajakji tangar Khrista tamang dangi anir arutsü nükjitong nung inyaktsüla. Ajak nung asenoki Khristan temeim tesangwaji ngudaktsütsüla. Asenok deobar yimsüji hombar asoshia lir.
Kibuba, Na sentsüwangshidaktsütsüsa anogo shia onok tebilemba merüktetjang. Amen.