Hombar nungi Nagaland ajunga mokdangtsü

Kohima, February 11 (TYO) : NTAC Kohima aser JCC nati mokdangtsü ayongzükba ama Angami Youth Organisation (AYO)-i February 13 anepdang 6:00 ako nungi nikongdang 6:00 ako tashi Kohima mokdangtsü ta metetdaktsüogo.
Naga nunger temeten kümzüka ayutsü atema inyakdang January 31 nü Naga nunger lanurtem kahsetba aser yirutsüba atema Chief Minister, Nagaland T R Zeliang-i tebilemba khuret bena chief minister menden metoktsüba atema mokdang ayongzüker, ta AYO president Neinguvoto Krose aser general secretary Kekhrie Pfukha nati sangdong nung shia lir.
Tangatetba shitak aliba Naga nungertem ajaki mokdangba sentong agizüktsü aser sorkar nung T R Zeliangi anir pa pusemertemi Naga nunger tamashi kümdaktsütsü aser mashileni anitsü merangba anema inyakba mapa nung pusema nungittsü ayongzüker, ta AYO mendenpurtemisa ashi.
Mapa lemzüka aliba volunteer dak alia AYO-i Angami nunger yim ajak nung tain aser tanur dak alaka tanüngba nisungtem ajak renema atatsü ayongzüker, ta parnokisa shisem.
AYO-isa asüng (Deobar) nikongdang 2:00 ako nung Kohima kübok kiyong ajak nungi lanur telok nung tirtem aser teshimtet nübotem den APO Hall nung senden ka amentsü ayongzüker ta metetdaktsüogo.
Mokdangba mapang Press/Media & Newspaper hawkers, Para military, Administration on duty, Medical, SP office Kohima kübok North/South police stations, aser tatidang agütsür kaketshirtem aser tesayurtem (exam duty) tenokdangba kübok maiter, ta AYO-isa ashi.
Ano külen, JCC-ia Dimapur nung Hombar nungi tenzüka anepdang 8:00 ako nungi 5:00 ako tashi mokdangtsü ayongzükogo.
Mokdangba mapang garitem aser nisung senzüsenbongba nokdangtsü aser shisaliok rejutem ajak shibangtsü, ta JCC-i metetdaktsü.
Ajisüaka, sorkar indang garitembo 24×7 nokdangtsü aser sorkar mapa inyakertemi timtem arema atatsü mepishir ta JCC-isa ashi.