Home Department-i tekülem sentong anena atatsü ajungshir

Dimapur, Metsüremi/March 31 (TYO): Linük shibanga aliba mapang tamagba yimsü dak sendakba lokti adenshiba anena atatsüla, ta Home Department ajanga March 31, 2020 nü sangdong ka ajanga ajungshi.
COVID-19 tashidak prokshiba wara mechi state ya tang anogo 21 atema shibanga lir, aser iba mapang tamangba yimsü tsütsü lokti adenshiba densema nüburtem sendenba tabu ajunga nokdanger, kechiaser item ajanga iba virus ya mela mela prokshia aor aser nisung taküm aika lendongi aier. Saka Arogo kar nung Deobarnü nütsüng aika jendi adenshia tekülem sentong agiba osang angazükogo. Anungji Home Department ajanga maneni Arogotem dang nüburtem ajungtsü mechi state shibanga (lockdown) aliba mapang nisung jendi adenshia tekülem sentongtem agiba anena atatsü ajungshir, ta sangdong ajanga ashi.