Home deptt. ya Home minister-baer Industry : ACAUT ; ACAUT telok ya Backdoor Political Agents : NPF

Dimapur, March 27 (TYO) : Nagaland Home department ya Home minister-baer Employment industry ama kümdaktsüogo ta ACAUT (Against Corruption and Unabated Taxation) teloki aija metetdaktsüogo.
Nagaland Home department nung, taoba küm pongo tsüngda, police meyirijang ana dak tali Naga nunger mapa bushir lanurtem nem memetetdaktsüi pei shimnütsü shimba mapa aitsüba sangdong ka nung ACAUT teloki iba taitsüba osang ya metetdaktsü.
Taoba hopta tatar senden nung tasüngdangba ka langzüa ashidang, Nagaland Home Minister-i Nagaland police meyirijang ana dak tali tatidang magi parnok shimnütsü shimba mapa metena jembibaji Naga nunger lanur lakh dak tali mapa mengui alirtem mezüngmeshia jembiba o ka asütsü ta ACAUT telokisa metetdaktsü.
Kasa tatar senden nung Home minister, Y.Patton-i Nagaland government-i 2010 küm renemba “P&AR memorandum” ka nung police department nung “lower grade posts” nung inyaker shimtsü asoshi government nungi temelaba balaka menüngdak ta aliba tenüng atemer ABSI/UBSI aser clerical posts nung shimbaji linük temzüng anema inyakba mapa ka asütsü ta ACAUT telokisa ashi.
“India temzüng arrla 16 nung government mapai aitsü asoshi senso ajak nem kasasa maongka agütsütsüla ta shia lir, anungji Home minister-i ibaji metettsüla,” ta parnokisa ashi.
2015 küm November 5 nü Chakhesang Students’ Union (CSU)-i Home department nung inyaker meyirijang aika mashilen nungi shimba aija metetdaktsüogo, ajisüaka ibaji government-i kecha hau ta melii inyaka aruba reprangtetter ta ACAUT telokisa metetdaktsü.
Ano, home department nung taoba küm pongo tsüngda nisung meyirijang ana dak tali tatidang magi aser shinga nema memetetdaktsüi shimba jagi Naga nunger kintem rongnung backward purtem nem 37 % shiteta yutsüba shilema dena magütsütetba angur ta ACAUT telokisa ashi.
Anungji, iba atemaji ENPO aser tanga backward tribe nung dena aliba Naga kintemi ola adoktsüla ta ACAUT telokisa ayongzük.
Tan tatar senden nung Home minister-i pa department nung nisung paikaji tatidang magi pa shimnütsü shimba taiji pai pasasa nangzüktsü melen SP aser Commandant purtem nem nungloktsüba jagi teti asoshi yimya tamajung ka tenteta yutsüogo ta parnokisa sasaseta metetdaktsü.
Tang amai ozüng aser inyakyim telatet ka kübok senso ajak nem kasasa maongka agüja inyaker masü saka nübortem dang miimshia pei ajung asaa inyakba mapatem agi Naga nunger lanurtem mulungjang kanga tipmedemi kümdaktsüogo ta ACAUT-isa ashi.
Küm shia NPSC ajanga mapa ishika atema tatidang agiba nunga nisung meyirijang aika arur saka Home department-ibo NPSC nem tatidang agidaktsütsüsa mapa tazüng magütsür, iba jagi Naga nunger lanur tajung aika akoksar ta ACAUT teloki ashi.
ACAUT-isa Home department nung inyaker mashimashi shimba purtem katitsür külenang parnok shimertem nem temerenshi agütsütsü melen tatar senden nung chief minister-i ‘yaser tarutsü nung yamaji aibelena meinyakli” ta dang ashiba kija agibo Nagaland nung temelenshi mangutsü, anungji Nagaland nung government mapa inyakertem tejak repranga mesüra ochimashi len nungi shimba mapatem anendaktsütsü asoshi sengtong tajung ka atonga inyaktsüla ta ACAUT telokisa metetdaktsü.
ACAUT teloki Home department nung dang masü saka tanga department-tem nunga shinga nema memetetdaktsüi pei ajunga asaa shimba tenzükertem ajak anentsütsüla ta takangba agüja lir.
NPF government mapa ya ochimashi aser ozüng alema mashimashi inyakba telokang ka kümogo, anungji tangyongi Naga nunger lanurtemi taruba election 2018 nunga NPF teloksa arudaktsütsü asü ta bilemdangtsü mapang tongogo ta ACAUT telokisa tayongzükba ka agütsüogo.
ACAUT teloki government-i inyakba mapatem aitsüba maremteti NPF teloki sangdongba osang ka nung, “ACAUT telok ya Backdoor Political Agents lir,” ta ACAUT pur aija metetdaktsü.
ACAUT purtem shirnoki government-i inyakba mapatem aija anidaker, parnokjiang shishilembaba mapa nung ochimashirtem lir aser parnoki yimten nung shilem agitsü meranger ta parnokisa ashi. Aji oda, 2018 küm election nung NPF meyaritsüla ta lanurtem nem metetdaktsüba jagi parnok tebilemba sayur ta NPF telokisa metetdaktsü.