Home Minister-i CAB atema sangdongba NPF-i pela agizüker

Kohima, Mongputeni/Oct. 08 (TYO): Meghalaya Chief Minister Conrad Sangma aser Mizoram Chief Minister Zoramthanga nati mezüng anogo nungi Citizenship Amendment Bill anema shidak nokdakba asoshi Naga Peoples’ Front-i pelashishia agizüker, ta Naga People’s Front Press Bureau ajanga sangdong ka nung ashi.
Tebilemtsü angateta North-East aser talisa Nagaland, Mizoram aser Arunachal Pradesh nüburtem tejangraba wazüka ayutsü mechi Citizenship Amendment Bill (CAB) nung ‘special clause’ ka inoktsü ta Union Home Minister, Amit Shah-i Aizawl nung Honibarnü sangdongba atema pelar.
Nüburtemi aginüba ama Meghalaya Chief Minister Conrad Sangma aser Mizoram Chief Minister Zoramthanga nati angatetba ama masü saka Neiphiu Rio-ibo tarutsü nükla junga mongui Arrla 371 (A) aser Inner Line Permit (ILP) kübok jenoker, ta sangdong nung shia lir.
Nagaland densema NE State tem kümzüka ayutsü asoshi Bill nung special clause ka inoktsü ta Union Home Minister-i sangdongba ajanga Nagaland ya iba amala provision kübok kümzüka lir ta Chief Minister, Neiphiu Rio-i tongmelang agi angatetba ya tai ta tanü kuli sayutetogo. Iba amala special clause ka medeni iba Bill kübok State kata kümzüka mali, ta parnoki ashi.
Neiphiu Rio-i iba Bill junga memetetba aser iba ajanga timtem agütsütsü aliba mejangjaba den Lok Sabha nung iba Bill agizükba mapang par MP-i Parliament Session nung madenba ya kangasa tia maka lir. Iba Bill ya Rajya Sabha nung metsükdak ka asübo tanü Nagaland jenjang kechi nung lila? Chief Minister Neiphiu Rio aser Lok Sabha MP, Tokheho Yepthomi nati tanü Naga nungertem iba ama lendong aketba Act nungi kümzüktsüsa jenjang nung lilasü?, ta NPF ajanga sangdong nung shia lir.
June 5, 2019 aser January 7, 2019 anogotem nung Cabinet Meeting agiba mapang Neiphiu Rio aser par Cabinet-i kodanga iba Bill anema menokdak. Iba sülen January 28, 2019 nung Rio aser par Cabinet temi iba Bill anema nokdaktsü lemtet, koba Arrla 371 (A) aser Inner Line Permit kübok state kümzüka lir ta parnoki bilema liasü.
Naga Peoples’ Front nungi MLA temi CAB anema nokdaka February 2019 Assembly Session mapang ayazüka ao, koba constitutional provision ana – Arrla 371(A) aser ILP/Bengal Eastern Frontier Regulation, 1873 – meyokteper Citizenship Amendment Bill ya yanglu. Kasaji PDA sorkar indang resolution-a liasü aser Opposition Party-i Assembly nung kodanga magizük, ta sangdong nung shia lir.
Mangatetep aliba Bill nung ya clause tejangja ka meinoksem tashi NE India nung state kata Arrla 371 (A) aser ILP densema provision kecha küboka kümzüka mali, ta Naga Peoples’ Front-i tetenzük nungi meteta liasü.
January 8, 2019 anogo 16buba Lok Sabha nung iba Bill magizükdang item tebilemtsü ya jangjateter ali asübo tajung aika inyakteter lila, kong state asemi longjemer nokdak asübo iba tebilemtsü tajunglen nungi angateteper lila. Sakasa, kodanga matalokba dangbo menur asüyonga atalok tajungba ta ashi ama, NE India nung lisopurtem temeden aser maitsü wazüka ayutsü nükjidong nung osang tajung sangdongba onoki pelashishia agizüker, ta NPF Press Bureau ajangasa metetdaktsü.