Home Minister-i semdangtsü aliba atema traffic tetuyuba kar agutsü

Kohima, Yimpoksüi/November 29 (TYO): Union Home Minister-i December 1, 2018 nü Kohima aser Naga Heritage Complex, Kisama semdangtsü aliba dak sendakba nung security atema traffic ozüng kar melenshia benoktsü, ta tanü PRO Kohima Police-i sangdong ka nung metetdaktsü.
3rd Assam Rifles Helipad nungi LCS Building, TCP Gate, Classic Island ajanga Raj Bhavan, Kohima tashi, aser NH-2 nung Raj Bhavan nungi Kisama tashi gari anena ayutsü memelatsü, item lenmangtem nung gari anena yura atsüer aotsü aser gari kiburtem nem temerenshi agutsütsü, ta kasa sangdong nung shia lir.
Car passes aliba garitem ang Gate No.-I/Main Gate, Naga Heritage Complex ajanga aitsü melatsü aser car pass nung shia aliba apir lemzüktsüba Parking Zones nung gari anentsü;
Car Pass ‘Z’ (Temesüng den temeren Background) aser ‘O’ (temesüng den anüng sentsü Background) garitem Bamboo Conference Hall temalen anena ayutsü; Car Pass ‘Y’ (temesüng den tanen Background) garitem WW-II Museum Complex telung nung anena ayutsü aser Car Pass ‘X’ (temesüng den anüng sentsü tesangwa/Light Blue Background) garitem den ‘T’ (tanak den wakong Background) garitem Gate- II anasa parking tesem nung ayutsü.
Ketdangsertem aser nüburtem dang December 1, 2018 nikongdang 2:30 ako tashi nungbo sentong agitsü tesem, Kisama tongseper alitsü metetdaktsür, kechiyong Home Minister aser pa meina arurtem lenmang nung timtem malitsü atema gari senzüsembongba nokdangtsü, ta sangdong nung shia lir.
Ano iba anogo nung anepdang 8:00 ako nungi aonung 10:00 ako tashi Kohima leni aruba gari tulutem Inter-State Police check gate, Khuzama nung nokdangtsü aser Kohima jila telungi aitba gari tulutem anepdang 8:00 ako nungi aonung 8:00 ako tashi By-pass traffic police booth nung nokdangtsü.
Commercial trucks-a anepdang 8:00 ako nungi aonung 8:00 ako tashi Kohima jila nung mesenzüdaktsütsü, ajisüaka Hornbill dak sendakba duty garitembo menokdangtsü. Anungji jila nung khu loading aser unloading ji anepdang 8:00 ako tashi nungbosa tembangtsüla, ta kasa osang ajanga metetdaktsü.