Home Minister & NE CM tem senden nung TR Zeliang-i onük aika benok

Dimapur, July 11 (TYO): July 11, 2015 nü Guwahati nung Nagaland chief minister, TR Zeliang-i Union Home Minister, Rajnath Singh aser North East Chief Minister tem senden nung denogo.

Senden nung jembidang TR Zeliang-i ashiba agi, NSCN (K)-i ceasefire agienba osangji state sorkar dang mashi.

Iba osang ya state sorkar den lemsatep asübo sorkari mulungtet teloktem ajanga Khaplang dang ceasefire maneni alitsü asoshi jembidaktsüla, kechiyong Naga nunger timbakati yimjung aginür, ta TR Zeliang-i ashi.

NSCN (K)-i ceasefire agienba sülen state sorkar aser security forces-i tensa azüoktsü atema teinyaktsü mapatem inyakdar, ta paisa shisem.

Nagaland Legislators Forum on Naga Political Issue-i Parliamentary Working Committee ajanga Naga Hoho aser Eastern Naga Peoples Organization (ENPO) nungi teshimtet telok ka Myanmar-i oa Khaplang den ajurutepa India sorkar den ceasefire yanglutsü olemteptsü telemtetba agiogo, ta Nagaland chief minister-isa senden nung metetdaktsü.

Naga nungertemi AFSPA agiendaktsünür aser iba nung ajemdaker Nagaland sorkari küm aika AFSPA agientsü atema mepishia arur. Tang NSCN (K)-i ceasefire agiener liaka, state sorkaribo Nagaland nungi AFSPA agientsüla ta akhanger, ta TR Zeliang-isa ashi.

Paisa, Indo-Myanmar tsüngda gari lenmang alitsü nüngdak, kechiyong gari lenmang maliba ajanga North-East nungi telungpur telok aika Myanmar arrtsülen jenoker.

Gari lenmang maliba ajanga sepaitemi international border junga menükteter. Anungji Centre sorkari tekaratiba nung Indo-Myanmar arrtsü anasa gari lenmangtem yanglutsüla, ta Nagaland chief minister-isa nenshia metetdaktsü.

Nagaland State Police tashi itshitsüla aser ibaji asoshi prangpong-injang, garitem, communication aser Police Housing facilities nungertem nüngdaker. Aji asü nung MHA-i telungpurtem khuret aliba state tem nung Police Modernization Scheme mapa küma inyaktsüla. Iba ya NITI Aayog Sub-Group of Chief Ministers nunga enoksema lir, ta paisa ashi.

Anosa, Centre sorkari village guard nem taa agütsüba reprangshitsüla kechiyong parnoki International border nung telungpur anema inyakba mapa nung shilem tulu agir, ta TR Zeliang-isa shisem.

NE tesem atema tangar dang nungi alia NLCPR aser NEC funds agütsü. North East state temi state lemzükba noklang nung shilem ter agütsütsü asoshi timtem ajurur aser iba ya ajanga mapatong aika anendaka lir, anungji NLCPR & NEC project tem atema state lemzüka aliba noklang nung shilem terji agientsüla, ta TR Zeliang-isa mepishi.

Paisa ashiba agi, special status lemzüktsübaji tanü tashi lir aser special category state timbaka ketdangsüba aser rongsenren atema masü saka yimten dak sendakba maparen nung ajemdaker tenzükba lir. Mapang talangka yimten tsütsü mepetmesü adoka arur Nagaland ya 1962 küm Sixteen Point Agreement ajanga India nung state 16 buba ta jatet.

14th Finance Commission nung aliba ama North East state tem nungi saru ajema agiba sülena state tem indang rongsenren jenjang memelenshii dang lir. Anungji, iba ama mapang ka nung North Eastern States nungi Special Category Status magientsüla, ta Nagaland chief minister-isa mepishia metetdaktsü.