Home Minister Y Patton-i GB tem ayongzük

Dimapur DC office kima Honibar nü Nagaland kilo kilonser Y Patton-i  GBs Union Dimapur Silver jubilee nüngshilung sayatsüba sülen agiba noksa ka yangi angur. October 10, 2015.

Dimapur, October 10 (TYO) : North east telungpurtemi Nagaland nung arua miima tesep tenteter ozüng alema mapa inyaksangshir aser item mapa atema Naga nunger dak tai tongloktsür, ta Home Minister, Y Patton-i ashi.
Honibarnü IMC hall, Dimapur nung GB’s Union Dimapur küm 25 ajungba benjungmung nung o jembidang Y Patton-i ashiba agi, ozüng alema arur bendangertemi Nagaland nung tensa mejungi kümdaktsür.
Iba dak sendakba nung GB temi pei pei kiyong nung alir ainer aser bendanger nisungtem ajitettsüla, ta pai ayongzük.
Dimapur nung lokti tentet onsara akümba atema jembidang, Home minister-i ashiba agi, tentet aika sen sarutsü atema dang tenzüker, anungji Dimapur district administration-i kanga junga reprangdangba sülen tentettsü tim ta asüba telok nemang temelaba agütsütsüla.
Naga yimten tebilemtsü atema jembidang Patton-i ashiba agi, tawa tu India prime minister-i ita ka tsüngda iba khuret koktettsü ta shiogo, ajisüaka iba onük asoshi telemtetba agitsübaji Naga nunger ket nung dang lir.
Naga yimten tebilemtsü atema telemtetba tajung ka agitettsü atema GB temi Naga nunger yimten telok ajak longjemdaktsütsü atema tali temerangba inyaktsüla. Naga yimten teloktem longjemdaktsütsüji asenok ajak asoshi tebilemtsü lir saka GB temi tongti süa inyaktsüla, ta paisa ayongzük.
GB temji public aser sorkar tsüngda apu ka ama lir, kechiyong nenok nem nübortemi wadang tulu inyaktsü nunglokja lir. VCC mesüra VDB elections nung GB temi teka maitsüla kechiyong nenoki meranga inyakba ajanga tenüng tajung anguba amajok akümtsü, ta Patton-isa GB tem ayongzük.
Tanü Home minister Patton-isa DC office complex nung jubilee nüngshilung sayatsü aser DABA Associate Pastor, Rev. Lima Jamir-i ibaji meshiteta sarasademtsü.
Sentong nungsa Irrigation & Flood Control Parliamentary secretary, Jacob Zhimomi, SDO (C) Dimapur, Naga Council Dimapur, president, Nagaland GBs Federation, president Dimapur District GBs Association, Muslim Council Dimapur nungertemi o jembi.