Home Ministry committee kati cybercrimes mita reprangtsü

New Delhi, Chiteni/July 05 (Agencies): Union home ministry-i mapang shia cybercrimes mita reprangtsü aser social media nung olulu aser tashishitsü ocettem mita reprangtsü atema joint secretary ka kübok committee ka tentettsü atema telemtetba agiogo, ta tanü tongti ketdangser kati metetdaktsü.
Joint secretary ka kübok cyber & information security (CIS)-i mapang shia item ama mita reprangtsü, aser tashishitsü osangtem nokdangtsü atema parnoki law enforcement agencies aser state police den amalitepa inyaktsü, ta home ministry ketdangser kati metetdaktsü.
Iba committee-i bendenba osangtemji home secretary, Rajiv Gauba-i reprangshitsü, aser social media platforms den amalitepa inyaktsü atema pai telemtetba agitsü, ta ketdangserisa ashi.
Tawa India linük nung social media ajanga olulu prokba nung ajemdaker loktii nisung aika tepsetba mapang ka nung Home Minstry-i iba committee tentettsü.
WhatsApp ajanga tanur puer aortem lir ta olulu prokba nung ajemdaker taoba hopta Maharashtra state kübok Dhule district nung nisung pongu tepset aser Tripura nunga nisung ana tepset, yamaji tanga state tem nunga aika tepsetogo.
Taoba ita home secretary, Rajiv Gauba-i social media platforms- Google, Facebook aser Twitter nungi ketdangsertem den senden ka mena, tesempa o, kiralongra dak sendakba video, tanur azüapongba noksatem, taila osang aser tashishitsü aketba osangtem nokdangtsü atema jembia liasü.
Ketdangsertemi social media platforms dang tanga linüktem nung inyakba ama India linük ozüng nung ajemdaker inyaktsü metetdaktsü.