Home Ministry-i Chakma-Hajong onük atema senden agitsü

Itanagar, October 25 (Agencies) : Arunachal Pradesh nung Chakma aser Hajong refugee khuret atema kobi melii Union Ministry of Home Affairs-i senden ka agitsü aser idangji telemtetba ka agitsü, ta All Arunachal Pradesh Students’ Union (AAPSU)-i metetdaktsü.
Chakma aser Hajong refugee tem state nungi anientsü atema AAPSU-i tezüluba ka nung takhangba agütsü aser iba atema jembidang Union Home Minister Rajnath Singh-i AAPSU aser Core Committee on Refugee nunger dang tekaratiba nung Home Ministry-i telemtetba ka agitsü ta ashi.
Nüngdak adokra AAPSU züngsemtem jaoktsü, ta Rajnath-isa parnok dang ashi.
Senden nung Union Minister of State for Home Affairs Kiren Rijiju dena liasü aser pai ashiba agi, tawa Supreme Court-i Chakma aser Hajong refugee nem senso agütsütsü temelaba agütsübaji centre sorkari süoki ia bilemer.
Iba senden nungsa AAPSU president Kamta Lapung-i küm aika AAPSU-i Chakma aser Hajong nungertem anema mapa inyaka aruba osang metetdaktsü.
Tesüiba küm 50 tsüngda Centre-i iba khuret atema kecha meinyaktsü, ta paisa ashi.
Arunachal nungertemi linük meimer aser linük asoshi taküm bendanga agütsütsü mulunga lir. Ajisüaka, bendangertem ozü lima nung senso agüja lidaktsütsübaji onoki magizüker, ta AAPSU general secretary Biru Nasi-ia metetdaktsü.
Supreme Court-i oshidang agütsübaji Arunachal Pradesh nunger ajaki magizüker, ta Core-Committee chairman, Gumjum Haider-ia ashi.
India sorkari Arunachal ya India nung tongtipang shilem ka züngshir süra, Supreme Court, Election Commission of India aser NHRC nungertemi pei nisung toktsür bendangertem pusemer, ta paisa shisem.
Iba senden nung J.P.N. Singh, Director NE-1 Ministry of Home Affairs aden.
AAPSU-isa Arunachal East constituency nungi MP Ninong Ering dang iba tebilemtsü atema olen ka ashitsüla kechiyong pai ozüng alema arua alir 95% alidak nungi MP lir ta takhangba agütsü.
AAPSU-isa MP (Rajya Sabha) Mukut Mithi dang nungi telangzüba ka meshiogo aser Arunachal Pradesh nungi MP ana yagi pei state atema mebilemtsür ta shiogo.