Honduras election nung opposition telok jenjang tajungba lir

Tegucigalpa, November 27 (Agencies): Honduras nung tir atema election agiba tembanger osang mesangdong tsüngta candidate anati Central America nung aliba linük nung tir menden nguogo, ta tena sasa sangdong.
Election tembanger ghonda 10 jungnüa lir Supreme Electoral Tribunal ajanga preliminary result mezüngbuba sangdongba nung Opposition Alliance telok nungi candidate Salvador Nasralla ya shilem 45.17 agi timba lir. Pa sülen National Party nungi Tir Juan Orlando Hernandez-i shilem 40.21 aser Liberal Party nungi Luis Zelaya shilem 13.77 nung lir. Iba osang ya vote shilem 57 azüngba nungi sangdongba lir.
Ruling conservative National Party nungi Hernandez-i iba election nung takok nguogo, ta pa-sasai sangdong aser ketdangser osang meliaka Nasralla-ia pa tir akümtsü asoshi osang peria lir, ta Deobar aonung sangdong.
Iba election ya tir-i election tanaben agishitsü ken o benok, saka poll metenzük tsüngta mangatettep ken o agi sünga liasü.
Ashikülaka sorkari election nung takok angutsü renema lir, ta opposition teloki nübuyimba mapang aitsüba ajanga election ketdangsertemi aibelen mapa inyaka alitsü südi, ta election tembanger temulung melemteti lir.
“Parnoki khen bo onok dang nungi election auyaogo,” ta Xiomara Castro-i osangbener dang la 2013 küm Libre Party nungi tir atema toktepba indang süoka ashi. Election inyakyim nung aibelen inyaksema lir, ta opposition teloki aitsüba mapang Hernandez-i Castro madak takok ngua liasü.
“Asenoki küm pezü tali timtem aser tejashi nung alitsü memelatsü, kechiaser Juan Orlando Hernandez indang sorkar kübok küm pezü iba tia nung liogo,” ta taoba Tir Manuel Zelaya indang kinungtsü aser taoba First Lady, Castro-i ashi. Taoba Tir Manuel Zelaya ya US teyari amshia mitkartemi 2009 küm tir menden nungi atsüngdok.
Supreme Electoral Tribunal ajanga preliminary osang ya nikongdang 7:00 (01:00 GMT) ako nung sangdongtsü imla liasü, saka ghonda tenet jungnüa thinenba ajanga, result nung temelenshi tulu aliba mapang osang tesadang metetdaktsütsü ya tim yimya masü, ta ashir.
Ketdangsertem nungi osang meliaka nikongdang 8:00 (02:00 GMT) ako nung Hernandez-i takok anguba sangdong. Ghonda ka shi lir Nasralla-ia takok nguogo, ta sangdong.
Honduras nung Deobarnü tir atema vote agütsütsü asoshi nisung million 6.2 temsüa liasü, Congress züngsem 128, Central American parliament representative 20, mayor 298 aser local ketdangsertema lir.