Hong Kong billionaire kati sen mn 48.5 agi diamond 1 alizük

Geneva, November 12 (Agencies): Hong Kong nung alir billionaire shishilembar kati dollar sen million 77 agi sentsü balaka adenba diamond sentilung tulu 2 tashi Geneva nung agiba auction sentong nung alizükba osang ka tanü Brehostibar nü metetdaktsüogo.

Taoba mapang ochimashi inyakba ken o nung aitsüsang, Joseph Lau-i carat 12.03 ‘Blue Moon’ diamond otsüsütsüsa dollar sen million 48.5 agi tan Bodbar nü alizük ta pei tenüng metetdaktstüsü memulungba Lau’er otongdar kati osang jangjashitsü.

Britain kübok London nung tentetba osettsüset auction asüba telok, Christie-i Switzerland kübok Geneva nung ayongba auction sentong nung Lau-isa carat 16.08 pink diamond tanga ka dollar sen million 28.5 agi alizük ta New York nung tentetba shishilembaba telok, Sotheby’s-ia metetdaktsü.

“Joseph Lau-i sentilung anaji alizükba sülen par arishi küm 7 tain jala nüngtem nung sentilung anaji ‘The Blue Moon of Josephine’ aser ‘Sweet Josephine’ jatsüogo,” ta otongdari ashi.

Angoti ka nung mesenlokba blue diamond-ji alima ajunga nung blue diamond tulutiba rong nung densemba osang bushiteta lir.

Küm 5 tejaklen agiba auction sentong tanga ka nung Graff Pink ta ajaba diamond sen million 46.2 agi alizüka sen timba agi diamond alizükba otsü yanglu saka Blue Moon-i tan iba otsüji ajangtetogo.

South Africa kübok Cullinan mine nungi yaküm, 2014 küm tutetba Blue diamond-i carat ka sen millon 4 dak temai alizükba otsüa tan yanglur lir.