Hong Kong by-election tang tagidak lir

Hong Kong, February 28 (Agencies): China Legislative assembly nung züngsem ka menden nungi aluba sülen iba menden tazüng asoshi linük nungi candidate tenet Legislative by-election ka ajanga toktepdar. Deobarnü nisung meyirjang aika adenshia iba election nung vote agütsüogo.
Polling tenzüker mezüngbuba gondha pezü nung New Territories East constituency, Hong Kong nungi nisung 81,400 dak temai vote agütsü.
By-election atema vote agütsütsü asoshi anepdang 7:00 ako nungi tenzük aser aonung 10:30 ako nung tembangtsü, ta EFE osang ajanga metetdaktsü.
Linük nung electrol inyakyim nung temelenshi bener arutsütsü nangzükba meinyaktetba sülen 2015 June ita nung Civic Party nungi yimsüsür Ronny Tong menden nungi atsüngba ajanga iba by-election ya agirba lir.
Nüburtem vote agütsüba mapang candidate tenet prongla vote tali angutsü asoshi kanga meranga nübu ayimba sentong kaa liasü.
Parnok rongnung Hong Kong Indigenous Party, independence candidate Edward Leung Tin-kei yabo tan ita tetenzüklen telok raratepba ka nung pa dena shilem tulu agiba ajanga tepuokdak yua liasü aser ibaji ajanga nübur aikati pa jangja aküm.
Tan iba by-election agiba ya linük yimti ajak nung September ita election agitsü aliba asoshi nüburtem tendangba mapang ka mesüka lir.