Hong Kong Open: Sindhu semi-i ai; Saina-i tamakok angu

Hong Kong, November 25 (Agencies): India’er tetsür badminton asayar mongin, Saina Nehwal-i lar quarterfinal asaya nung tamakok ngua, tang tasayadak Hong Kong Open badminton asayamong nung joko toktepa shilem magitettsüsa jenjang tamajung tanü, Hokolbar nü ajuruogo.
China tsür, Ngan Yi Cheung-i tanü ghonda ka tema nung points 21-8, 18-21, 21-19 ngua, arishi küm 26 tain Saina tetsür singles quarterfinal asaya nung tsükdaktsü.
Ajisüaka, külem sensotsür, P.V. Sinhu-i lar quarterfinal asaya koka, tetsür singles semifinal asayatsü jenjang tanü ajangzüka liasü.
Olympic silver medallist, Sindhu-i tanü ghonda 1 ser minute 19 shi nung points 21-17, 21-23, 21-18 ngua, Singapore tsür, Xiaoyu Liang madak takok angu.
Lai tanü takok anguba sülen Saina tsükdaktsüla, Cheung den lar semifinal asayatsü lemzükogo.
Tanü tashi nung Sindhu-i tetsür badminton asayar tarensen nung 9 buba jenjang ajangzüka, tsünglangleni jenjang 5 tashi lua, tang 11 buba jenjang nung alila, Saina den temaba jenjang ngua lir.
Ano külen, World No.1, Spain tsür, Carolina Marin-i Chinese Taipei tsür, Tzu Ying Tai den tanabuba semifinal asayatsü lemzükba osanga angazükogo.
Carolina-i Japan tsür, Akane Yamaguchi tsükdakja, semifinal asayatsü jenjang angu aser Ying Tai-ia Japan tsürsa, Aya Ohori madak quarterfinal asaya koka, semifinal-i aiba osang jangjaogo.