Honibar Bazar

– N.Imo Longkumer.

Tir Yimyim paper ajanga taoba hopta nung Mokokchung district küpok Hapta Bazar akaba (advandages & disadvantages) indang shisatokden agiogo. Iba indang tongtipangsa Changtongya Area atema ni ajangshiba aser tangatetba ka shinür. Asen lima nung küm songdema medangdangi lijaliyongtsüsa ano kecha tsünütetta maka saka mongpu süngjang aser aonsotsü karbo angur. Tsümar bazaar atuba ajanga January ita nungi December tashi aonsotsü balala aser oset-tsüset tapu balala jenjang dalang agi alitsü angur.
Süoshi, chibo anbo, insang oset, ango, ngashi aser aonsotsü tapu balala iba den ano manentsüemer aser nungdakpur atema konshia, Magor taküm angur. CTN nungi Amguri tashi km 60 shi lir anungji item oset abeni alutsü timtem aika lir. nisung kari bentetaka ibajagi kiyong ka meperir aser asenok yimya asünung oset aliba jenjang küsaji temloker ayoker. Kongshia taküm kg 1 nung Rs. 380/- yong locali ayok nung bazaar nungbo Rs.262/- tashi agi-a alir. Anungji sensaker atemabo Rs.120/- anüngzükbajia kanga pelar.
Bazaar nungji oset tapu ajak akar asünung nükjidong makaba nisungi kidang tangsabo menüngdak saka tanguba ajak alinüa bushira memeteti sen endoktsü. Saka bazaar atuba yagi tangbo nübortemi family budget yanglur aser sen meyimzüdaktsür. Tapu-tapu nangtena liaka asen yari terara alir arur. Bazaar nung aonsotsü balala bener atubaji liaka asen lima nung tsünütetba (fresh & organic) ji vitamin tuluba ta aikati angateta Mkg-Amburi lemang nung aliba yimtsüngtemi bener arubaji alia jangratema shishiteper.
Changtongya aser temeket nung süngjanglijang jenti tsünüteter kenkenbo tayokdak makar saka tangbo bazaar aturtemi cheru, polong, naspati, süngmok, squash, somomo item amala ajak alizüka bener alur. Anungji bazaar atuba atema local economic & business kecha tesama mali. Bazaar aturapang kechi südir süaka sen endoktsüla ta temzüng kecha lateta mali. Anungji asen yari alitsü oset jenjang dalang agi tonga bentsür aruba atema nübor pelar. Iba yagi socio-economic nung takoksa masü terenlok ang tajungba aor. Anungji lia len alirtemi ibai kanga tsüremseta mebilümtsüla. Bazaar oset bener arurtem ILP lira ser locality temzüng kechi renema lir iba küpoki aita bazaar shishir anungji leni-maor sensakeri-a pei yari taginüba aliteter.  Nübortemi kanga pelar. Tzümar nem sen ajunga bener yoker ta masü, parnok matu nunga hapta piyung atema senbosa endoktsü aser aji jenjang tasakba nung endoktsü. Atepzüng tashi bazaar atuba atema pelar, saka parnok dak langka tim masüba ajitetra nübori nokdangtsü.