Honibarnü BJP MLA tem senden nung UP CM shimtsü

Lucknow, March 16 (Agencies): Honibarnü, March 18 nü Uttar Pradesh yimtiba, Lucknow nung tang tasen shimba BJP MLA tem senden amentsü, aser iba senden nung parnoki legislature party lenir shimtsü.
Tanü osangbenertem den jembidang UP BJP General Secretary, Vijay Bahadur Pathak-i, “Party central observers – Union Minister M Venkaiah Naidu aser National general secretary Bhupendra Yadav nata Honibar nikongdang 5:00 ako nung ayongba senden nung adentsü,” ta metetdaktsü.
Legislature Party lenir shimtsü atema election agitsü asü? ta asüngdangba langzüdang Pathak-i, “Ni ibaji melangzütettsü,” ta ashi.
Assembly menden 403 aliba state, UP nung BJP aser par teloktepi menden 325 tashi nung takok nguaka BJP bangdak lenirtemi tang tashi Chief Minister menden atema shinga meshimteter.
2019 küm Lok Sabha election agitsü aliba temelung nung yur party-i CM shimtsü atema telemtetba agitsü kanga asaaker.
Tang tashi nung UP Chief Minister atema tenüng tetshiba rongnung Union Home Minister Rajnath Singh, Manoj Sinha aser state BJP Tir, Keshav Prasad Maurya nunger densema lir.
Par asem dak alia RSS den tesendaktep takhang alisang, Union Minister Mahesh Sharma tenünga tetshidar.
Tanü Maurya-ia, “Ibaji (UP CM) taruba anogo 2-4 tsüngda jangjatsü,” ta metetdaktsü.