Honibarnü nisung 236-i tenüng agütsüogo

Kohima, January 7 (TYO): Nagaland nung February 1 nü urban local bodies indang elections atema tenüng agütsütsü tenzüker anogo tenetbuba nung candidate 236-i tenüng agütsüogo.
Tenüng agütsürtem rongnung NPF nungi 47, BJP nungi 45 aser Independents 113 lir aser yashi tashi Congress-i tenüng magütsüi liasü saka tanü parnoki Councils 11 nung tenüng 31 agütsüogo.
Tanü tenüng agütsürtem züngsema, candidate ajak agi 558 jungogo aser parnok rongnung NPF nungi 268, BJP nungi 79, Congress nungi 31 aser Independent 180 lir.
Nagaland nung Municipal Councils 3 aser Town Councils 29 den wards 353 lir.
Shitakba agibo urban local bodies indang elections atema tenüng agütsüba tatembangba anogoji tanü liasü, saka State Election Commission-i anogo ka atsülangogo.
Tanü tashi nung tetokteper shingaia tenüng magütsüba council temji Kohima o Mokokchung Municipal Councils aser Tuensang, Mon o Changtongya Town Councils tem lir.