Honje Konyak-i arogotem dang mozü achirtem yaritsü ayongzük

Dimapur, October 5 (TYO) : Mon Deputy Commissioner, W. Honje Konyak-i arogotem dang ozüngi memelaba mozü achirtem taküm melenshidaktsütsü atema mapa inyaktsü ayongzük.
October 3, 2015 nü APMC Campus, Mon nung De-addiction Camp 2015 alidang Honje Konyak-i iba tayongzükba agütsü. Iba sentong ya Mon User’s Network ajanga ayongzüka agi.
Mon district nung opium aser tanga mozütem achir aika akümba khuret atema jembidang Honje-i ashiba agi, “arogotemi tanü mozülartem aser temenenpurtem dak temulung magütsü nungbo, tarutsü nung sentepi arurtem malitsü.”
Mon nung rongsenren aser tanga infrastructure maparen kanga mejungi lir aser ano ozüngi memelaba mozü achirtem tali bulua akümba atema nübortem kechi anga meinyak terata ka nung lir, ta Mon Deputy Commissioner-isa sasa bilemba olen ka ashi.
Mon Users Network-i anibelem arema aser senotsü endoka iba sentong tajung ayongzükba atema tenüngsang agütsür aser iba sentong ajanga khurtettem koktettsü asoshi telatetba ngutettsü imlar, ta paisa shisem.
Ozüngi memelaba mozü achirtem ya kibong, lokti aser shishilembabaren asoshi khuret tulu ka lir. Auyaba tatalokba teimba ka mozü achirtem dak sendaka aliba putetogo. Arogotem aser civil society temi iba khuret atema yaritep nungbo De-addiction Camp ya tanela nung taneptsü angudak ka akümtsü, ta Honje-isa ayongzük.
Medical department tenüng nung o jembidang, Dr. Chenjei-i ashiba agi, “nisungtemi mozülartemji majung ta züngshir aser parnok yaritsü atema Mon Users’ Network dak alaka shingaia tejaklen marur.”
“Iba camp nung medical therapy agir saka iba ya mapa tatsüka atema dang lir aser de-addiction camp ka nung nüngdakba metongteter. Iba camp nung teyari agirtemi mozü achiba yimya koktettsü ta temulungtetba alitsüla aser kasa mapang nung tsüraburtemia pei chirnurtem nungittsüla,” ta Dr. Chenjei-isa ashi.
Iba sentong nung Camp Director aser Mon Users’ Network founding member, Sashi-ia camp indang osang tatsü agi metetdaktsü. Youth Secretary KBBB Wangjah aser Konyak Students Union tir natia o jembidang Mon Users’ Network nem tenüngsang agütsü.