Honor 7X India nung yanglu tenzüktsü

Tsüklai 1, 2018 (Agencies): “Make in India” initiative dak ajemdaker China nunger electronics yangluba company Huawei-i parnok indang mid-priced segment device ‘Honor 7X’ Tamil Nadu nung parnok indang facility nung yanglutsüba sangdongogo. Honor puri Flex pur den longjemer Chennai anasa Sriperumbudur tesem nung Flex pur indang plant nung iba device yangludar.
“Honor aser Huawei puri India nung parnok indang product tem asadanga alitsü aser tenüngdakba apir maparen ajak inyaktsü,” ta Huawei Consumer Business Group, Sales, Vice-President, P. Sanjeev-i osangbenertem dang ashi. Huawei pur linük nung joko küm 18 shi shishilebaa arudar aser 2016 Rongjui (September) nungi tenzüka Flex India den longjemer paronok indang phone tem yanglua arudar. “Make in India” initiative kübok parnoki Holly 3 phone mezüngbuba yanglu aser iba sülen parnoki Honor 6X yanglu tenzük. Honor puri tawa alima ajunga nung mesaya tsüngda parnok indang product kar India nung sayaogo. Company ajanga maneni parnok indang service network atsülangshia tongtibang yimtitem nung service centers tasen pezü lapokogo. Taoba küm Luchii (December) nung Honor 7x sayaba sülen Honor pur takok tajung anguba ajangshia aruogo aser 2016 den medemdangra 2017 quarter pezübuba nung parnok shishilembaba asemben agi tali renlokba ajangshiogo.
Honor 7X 32GB + 3GB variant ya sen 12,999 yong angur aser 64GB + 4GB variant ya sen 15,999 yong angur. Iba device nung Kirin 659 octa-core 2.36 GHz processor (den Mali-T830MP2 GPU) den Li-Ion 3,340 battery ka keta aliba angutsü.