Hopta ana amungtsü aliba World Consumer Rights Day tenzükogo

Kohima Law College nung March 2, 2021 nü hopta ana atema World Consumer Rights Day tenzükba mapang Nagaland Voluntary Consumers’ Organisation tir Kezhokhoto Savi den Kohima Law College indang final year students tem tangokba noksa nung angur.

Dimapur, Metsüremi/March 02 (TYO): Nagaland Voluntary Consumers’ Organisation (NVCO) aser Kohima Law College lungjemer hopta ana amungtsü aliba ‘World Consumer Rights Day’ sentong March 2, 2021 nü Kohima Law College nung tenzükogo.

Plastic agi tzü-mopung menentsüba ajemdaktsütsü asoshi komasür awareness agütsütsü aser World Consumer Rights Day amungba ajanga nüburtem nem tzü-mopung wazüka ayutsü yimyatem angazükdaktsütsü asoshi sentong balaka agia liasü.

NVCO tir Kezhokhoto Savi ajanga “Tackling Plastic Pollution” omen nung ajemdaker hopta ana amungtsü aliba World Consumer Rights Day tenzüktsü, koba March 15 nung tembangtsü. Alima ajunga nung iba anogomung ya küm shia March 15 nü amunger.

Iba sentong nung Savi-i omen nung ajemdaker jembiba mapang, “Plastic ya asen takum nung anogoshi kanga nungdakba oset ka lir, saka asenoki amshiba aser yangluba plastic, talisa khen amshiba plastic ya mazüokteti kuma asen ecosystem nung kongshia tzü-mopung nung timtem agütsür aser nisung temang nung timtem agütsür,” ta ashi.

Plastic agi alima nenenba azüoktsü ya aliba ajunga nung tebilemtsü tulu lir aser iba atema amalitep aser alima ajungai shilem agiba nüngdaker. Ajisüaka asenok senso tajung kaka ama plastic azüoktsü, shisakaa amshitsü aser yanglutsü asoshi tongtipang shilem agitsüla, ta pai ashi.

2050 küm tashinung tzüyim nung ango dang nungi plastic timba alitsü ta asadangteta lir. Anogoshi plastic ton million 8 shi tzüyim tonga aor, küm shia plastic yangluba shilem 50 bo khen dang amshitsü akokba plastic lir, tang tashinung yanglua aliba plastic ya tesadang ka tesüiba küm 15 tsüngta yanglu, plastic agi yangluba oset shilem 40 packaging nung amshir aser itemji khen dang amshir indoker, ta pai ashi.

Savi-i consumer tem dang plastic agi tzü-mopung menentsüba atema khuret tali abentsü ajungshi aser shishilempaba mapang tanaben amshitsü akokba juli amshitsü, tanaben tzü inoka amshiba bottle tem amshitsü ajungshia liasü.

Tashidak wara agi alima ajunga sünger aliba mapang khen dang amshitsü akokba plastic amshiba tali akum saka tangbo asenoki tzü-mopung asoshi khuret abentsüla, ta Savi-i ashi.

Europe, US aser South America nungi consumer shilem 74-i sustainable packaging nung sen tali indoktsü molunga lir, ta paisa ashi.

Iba anogomung sentong tenzükba sülen parnoki jenjang balala nung consumer rights, environment protection, human rights, state consumer helpline with toll free No.1800-345-3701, tackling plastic pollution, food safety, food security amala onüktem nung SOP tem amshia awareness agütsütsü.

Lanurtemi iba atema shilem tulu agitettsü, ta ajiteta parnoki arogo nung lanurtem nem temolung agütsütsü.