Hopta ka tejaklen Viyay Mallya-i linük toktsüogo: Centre

New Delhi, March 09 (Agencies): India nung bank aika dang sentsüh crore 9,000 dak tema alisang yi shishilembar tetsüdi, Vijay Mallya hopta ka tejaklen India toktsür aoba osang tanü Centre sorkari Supreme Court dang metetdaktsüogo.

Tanü Attorney General (AG), Mukul Rohatgi-i Justices Kurian Joseph aser R F Nariman nati akümba Supreme Court bench dang, “Ghonda ishika tejakdang ni CBI den jembiogo aser parnoki kü dang March 2 nü pai (Vijay Mallya) India toktsüogo ta metetdaktsü,” ta ashi.

SC bench-isa Mallya dang temetetdaktsüba ka agütsüba den külemi Bank temi pa indang passport nokdangtsü aser pa SC matsüngdangi anir arutsü mepishiba dak sentakba nung hopta ana tsüngda telangzüba agüjang ta pa nem metetdaktsüogo.

Mallya ji linük toktsür London (England)-i ogo ta SC dang metetdaktsür asünungji joko SC bench-i AG-i mepishiba agizüka Mallya indang official Rajya Sabha Email ID, London nung Indian High Commission, court balala nung pa atema okatsüsang, Debt Recovery Tribunal aser par Company ajanga tongtepratepa inyaktsü.

Ken o tatsüka angadangba mapang AG-i, sen crore 9,000 dak tema sentsüh bank balala nung lir aser tatemtsü kuli kar nung ajemdaker Mallya-i item sentsüh paidoker, ta metetdaktsü.

Sentsü dak sentakba nung pa anema Bangalore aser Goa nung ken o kadar, ta pai ashi.

AG, Rohatgi-isa, bank temi Mallya ji iba okadak matsüngdangi arutsü aser pa indang passport nokdangtsü atema akhanger, ta ashi.

AG-i ashiba agi, Mallya-i yangi (India) apua aliba sen dang nungibo bendanglen pa indang rongsentemji kanga agi timba lir.