Hopta ka tsüngda nung migrant nisung 10,200 shi Sweden tonga ao

Stockholm, November 09 (Agencies): Tongpang raraba ajanga bener arutsüba timtem toushi nungi pei taküm kümzüka alitsü nükjidong nung pei linük toktsür Europe nung jenoka alitsü apusor migrant nisung 10,200 dak temai hopta 1 tsüngda nung Sweden linük tonga aoba osang jangjaogo.

Taoba hopta kisüng nung migrant nisung 10,201 shi par Sweden linük tonga aoba sülen taküm 2015 küm tenzüker tanü tashi nung migrant nisung 122,000 dak temai par Sweden linük tonga aoba bushitetba osang ka Sweden sorkari tanü Hombar nü metetdaktsüogo.

Sweden nung tentetba Migration Agency-i ashiba agi, “Taoba anogo 7 tsüngda nung migrant nisung 10,000 dak temai Sweden atongba ya tan mezüngsüa ataloker lir. Tan Sweden atonger nisung 10,201 rong nung tain nisungtemi maniba peisasa Europe bushir tila tanur 2,857 tashi densemba osang bushiteta tan otsü tasen ka yangluogo.”

Tan Sweden tonga aor rong nung nisung 4,300 dak tema Afghanistan nüburtem, nisung 2,720 shi Syria aser nisung 1,400 shi Iraq nüburtem aliba osanga bushitetogo.

Tan Sweden tonga aor migrant nisung meyirijang ishika European Union (EU) nung züngsemba tanüngba linüktemi yoka jenokdaktsütsü asoshi EU lenirtem dang mepishitsü asoshi lemtetba osang ka Sweden sorkar-isa metetdaktsü.

Taküm küm tatem tashi nung migrant nisung 160,000 shi Sweden tonga aotsü imlatsü tenzüka lir aser yamaji atalokba ajanga linük 28 züngsemba EU linük rong nung Sweden nung migrant nisung timba jenoker akümtsü ta sorkar ketdangsertemi metetdaktsüogo.