Hopta ka tsüngda TN assembly nung ‘floor test’ agitsüla: AG

New Delhi, February 13 (Agencies): Tanü Attorney general (AG), Mukul Rohatgi-i Tamil Nadu Angh dang, O Paneerselvam aser Sasikala na shiba den nübo timba (majority) ali’ar ibaji tendangtsü atema hopta ka tsüngda assembly nung ‘floor test’ agiang, ta shiogo.
Attorney general, Mukul Rohatgi-i state Angh dang, hopta ka tsüngda Assembly senden ka ayonga chief minister caretaker, O Paneerselvam aser AIADMK general secretary, Sasikala na shiba nübo timba alir’ar ibaji tendangtsüla, ta ashi.
Rohatgi-isa 1990s mapang Uttar Pradesh assembly nung Jagadmabika Pal aser Kalyan Singh na tsüngda floor test agiba ama agitsü asoshi Tamil Nadu matsüngdang benok.
Ano külen Sasikala anema la dak mapet rongsen bendena aliba ken o nung Mongolbarnü Supreme Court-i obendang agütsütsü, ta osang angazüker.
Sasikala-i, AIADMK MLA timbaka la den lir ta shiogo, ajisüaka chief minister Panneerselvam-ibo, Sasikala’er camp nung MLA tem pudena lir, ajisüaka tesülenbo parnoki pa pusemtsü, ta shiogo.
Tesüiba anogo ishika tsüngda MLA, MP aser lenir aikati Panneerselvam den denogo.
Ano külen Sasikala-i, Panneerselvam-i party nung telemsa adokdaktsütsü meranger, ta aitsür.