Hopta nung anogo tenet indang burapujia mashikoshi ratetba nüngjatem ASLB secretary ajanga sangdongba ya sobaliba den mapet

~ Tia Ao, Dimapur.

Tir Yimyim adok 075 December 2017 olemsabang nung ASLB sangdong nung zonizüng aser hopta nung anogo tenet züngya amshitsü ozüng aser 2018 nungi school nung azüngtsü textbook nung enoka menüngba metetdaktsüba olen ajanga angatetba. Ni ang junga mangatet asütsüa akok, saka ibai aika nungi shisa agidangbaji dang masü saka Ao Senden approval board ajanga temelaba agi tajungba. Iba yagi ASLB ya autonomous body ka ama angateter. Kechiaser olenji kanga tashiim (commanding).
Nüngjakoja mesüra züngya züngko lirumemedembatem lirumedema amshitsü atema sobaliba den mapetba, burapujiba nüngja/züngya azüngtsü mesüra jembitsü asoshi ambangyim mesüra tashiim (dictatorial) amshitsü madoker. Sürapang shirnoki sangdongba amaji mazüng mesüra mejembir, item dangji kechi ashitsü?
ASLB sangdong (zonizüng) ta alibajibo bangsentsü mali. Saka nüngja/züngya tenüng zülu nungji tatembangji ‘i’ melen ‘ye’ agi atem tajungba.
Sangdong B. nung Hopta nung anogo tenet nüngja/züngyaji asenok oshi nung liromedema mali ta metetsüngmonga O tasen burapujia nüngja tasen kaket nung enoka züngdaktsütsü aser yamaji jembitsü/zülutsü tashiim amshir, ya shibai buratet? Pai meyipa agitsüla mesüra tapet nüngja/züngya amshitsü asoshi nüburtem nungi tebilemba (opinion poll) yimjak nung osang kaket nung ayimokja meshiteptsüla.
Asen O nung tapet nüngja melira, shir oshi nung jembia arur, par oshi ji amshi tajungba. Asür Dr. I.Ben Wati-i züluba ama tangar oshi süaka asenoki yimyasubaa jembiba oji asen o akümbaji tai mali.
Ao Senden mesüra ASLB-i lemtetba tajung mesüra tamajung, shingaia obang metsükshitsü mesüra memodongshitsütsü ta tashi agüja mali. Saka tang tashi ASLB inyakyim asadangra, ASLB ketdangpur nem tashi ulora agüja lir ama angur. Anungji kija bilemba aser shisangshiriba, burapujia ni alidang ibai tenteta yutsüdi, ibai melena yutsüdi ta, asübatem ajakbo tapii agizüka mamshitsüla.
Item kuli kar ajanga Hopta anogo tenet nüngja/züngya apet-mapet, nüngja tasen (ASLB nüngja/züngya) den medemdanga shisadangtsü bendanger.
Asenok asoshi Hopta nung mezüngpuba anogoji English nung Monday, Assamese nung Hombar (1st day of the week in Eng.) English nunger züngya/nüngja. Assamese nung poilatin (mezüngnü) ta ajar.
1. Hopta nung anogo mezüngpubaji kodanga iba anogo dang “Tentonü” ta ajatsü makok. Ibai shinga kecha asoshia ratamata mesüra tentotenra (atemshiba) maru. English nung (Black Monday) taka ajar, oda Amungnü shidakbapo “Külemnü” anogo piyong kecha meinyak songtok-songtoka kazür awashitsü asoshi temang pezüpelema marakzünüi anepdang sakba yimya dang lir. Anungji iba anogo nung tentotenraba yimya-yimpong mali. Shidakbapo Tenzüknü.
Tsüngremia Anüng-Ali tetenzük (mezüng) mezüngnü yanglua tenzük.
Anungji hopta nung mezüng anogoji “Tenzüknü” mesüra “Mezüngnü” ta aja tapetba.
2. Hopta nung tanapuba anogoji tenzüknü mesüra mezüngnü tasüng anogo. Anungji iba anogo dang Tananü mesüra Tanünü ta aja tapetba masü no?
Saka maparen ajak tenzüka doker, teinyakto wadang nung molung sangwa-sangwa tenzüka maparen ajak tenzüka aoba agi Sangtennü ta ajabaji tamendakdak makaba O.
Sangwa-sangwa mesüra tenzüka aliba tenzükshiba dang Sangtennü ajatsü makok aser mapet. “Sangtennü” ta ajar taji shibai burapa aja? Buratetsangi ajabaji dang, saka tangari majar iba nüngja mamshitsüla.
3. Hopta nung anogo asempuba (Wednesday) dang “Rasemnü” nüngja ratetji tai, kechiyong koba amala mapatem rasemloka mesüra kechi nung kechi bendenloksemer? Itemji mashir, saka maparen ajak nung ta dang shia burapuji nüngja agütsübaji tamentakdak maliba nüngja. Anungji hopta nung anogo asembuba dangji “Tasemnü” ta nüngja jaa züngyaa amshitsüla.
4. Hopta nung anogo pezünübuba dang “Yangtepnü” nüngja ya sobaliba nung akhidang/alemli nungi yangteptsütep asoshi anogo balaka shimteta mali. Ibai yaritepba mapa masü saka kitakludak mapa nung nisung ana-asem ayongteper, dena-dena kenü ka mapa nung, kenü ka mapa nung ta tayang küpzüktepa inyakba, oda nisung kwika südir, iba amaji anogo kecha lemteta makai yangteptsütepba yimyasübaba inyakyim maparen (customary practice) lir. Anungji ibai sobaliba nung tetenzük nungi tenteta akaba anogo nüngja masü. Akidang tsürabur mapang nung iba anogo dang ‘Mekunü’ ta aja aser melenshiba mali.
5. Hopta nung anogo pongunübuba dang ‘Rogonü’ nüngjaji alemli nungi rogo-nüjah maparen asoshi anogo balaka lateta mesüra lemteta mali. Mashi anogo mesüra mapang nung kisü-jensü ama kiruk-luroh mapang nung angati nübo agüja yaritepba maparen dang ‘Rogo-nüjah’ ta jembir, saka anogo balaka nüngja jateta jembibaji burahba nungja dang. Akhi tsürabur tensa iba anogo dang ‘Meken-nü’ ta jaa aru aser temelenshi mali.
6. Hopta nung anogo trokbuba dang ‘Küptoknü’ nüngjaji alemli nungi küptoktsütepba anogo balaka lateta inyaksangshia aruba yimya mali. Anungji iba ama jungtepba mapa asoshi mashi mapang inyaktetba maparen ka asoshi anogo tenüng burahpujia ajatsü madoker. Saka Kibuba Tsüngremia anogo trok tashi nung pa mapa renemba indang asenoki Lai ajanga jangja-jangja metetnung “Renem-nü” mesüra “Khinang-nü/Mapatem-nü” ta tapetba masü no?
7. Hopta nung anogo tenetbuba dang alemli nisungtemi “Songtoknü” (Kecha meinyaki songtok-songtoka amongba) anogo ta aja. Saka tamangba yimsü arur külen iba anogo ya Kibuba Tsüngrem külemba anogo aküm. Anungji anogo tenetbuba dangji ‘Amungnü’ ta dang mejai ‘Kibuba Amungnü’ mesüra ‘Külemnü’ ta aja tapetba. Kechiaser asenok amongtsümong aika lir. Tsüngremmong, Moatsü mong, Lepkomong etc.
Tekümdangtsü kar:
Oshioben nung tsüngkang memedemba mesüra liromemedemba mesüra asen oshi nung maliba nüngja kar ashishitepba (disputed) nüngjakoja mesüra züngyazüngko tashiyim amshia ‘Ni’ alidangi ibai tenteta yutsüdi mesüra yanglushia yutsüdi ta inyakba ajanga nüburtem memakmakdaktsütsüla.
Tatemsa tebilemba kar shidanger.
1. Aolisanger asoshi literature committee ka dang ali tajungba. Ibaji ABAM literature committee asütsüla.
Iba committee nung ketdangpurtemji oshi nung takotet aser temeteter asütsüla.
Züngsemtemji tain atsünga (elderly) yimtsüngtem nungi kenshioshirtem shimtsüla.
2. Literature committee nung ketdangpurtem tenzükba mapang telemtet ayu tajungba yamaji mesüra kibur kümteta, tangar mezüngshi küma, pa juri meyong ama ajak nung ajak akümtsü temela.
3. Literature committee-ji school asoshi textbook adokdak ka ama aser tayokdak (dokan) ki ama mali tajungba.
Teyarir ka ama inyak tajungba saka jangjungmara masütsüla. Kechiaser Education Department nung textbook branch nung kin shia language officer lir aser item jagi pei-pei oshi nung tapet kaket adoka school nung züngdaktsür.
4. Literature committee asoshi approval committee alitsüla, saka autonomous tashi magütsütsüla.
Tajung kar danga lira temoatsü, melira tejashi mali.