Hopta nung anogo tenet nüngja o semlok

– P. Renthy Jamir.

Tir Yim Yim anaben adok May 24/25-2018.Tia Ao Dimapur “Hopta nung anogo tenet indang purabuji mashikoshi ratetba nungja ASLB Secretary ajanga sangtongba ya sobaliba den mapet” pai züluba den repsema O semlok kar hau shitak karbo nonga ta tangatetba tatsü agi zülur. Nübur aikati iba nungjatem ya osang kakettem azüngdang bulutepa ayur aser joko paper-a mezüngnür ta ashir, kechiyong pai züluba ama nüngjatem ya tetezü maka sobaliba den mapet aser skul text book nung yamala purabuji tamakitsü nüngja zülur azüngbaji tajangzük maka. Pai züluba nungsa yamala purabuji sobaliba den mapetba zülur kangshia züngdaktsütsü ambangyima tashiim amshia meinyaktsüla (Dictatorship) ta ashibaji shitak, kechiyong 2016 küm Aor Calendar atema ita, anogo nüngja indang temeteter aikati aki nüngja sobaliba dak keta jembia aruba bendener yamai asütsüla ta zülutep. Aika rongnung T.Meren Paul ama Y.Imti Tzüdir ama Talitemjen Imchen ama bilemteter. Nia anaben tashi züludang.
Saka Aor kinük ajak nungi shisa bendenbaji ASLB-i manemeri Chilem yilem magizük ama, an kolak nung tzü mamung ama mangai milongsang nung matem ama to kenyongi magizük. Joko züngsem kar den jembi nung onoki renembaji memelenshitsü ta lemtetogo ta ashi. Yagi Tia Ao-i tashiim amshir ta zulubaji metentsür. Pai anogo terok abensa-a shiogo aji melepshir. Saka anogo tenet buba indang nung amungnü ta aliba ya onokibo Barmung ta ajar Dr.Clark marudang akimapang nungi Aor tzüma limai shishitsü alu. Ibaji tzümar Deobar bazar nung shishi. Anungji Barmung tetezü tzümar Deobar bazar anogo. Clark arur-a Deobarnü ta tekülem nü ta masü Barmung nü ta-ang jembi. Tantsür tamburi bazar ta masü bar, bardak ta-ang jembi karibo bojar ta-a ajar.
Tsürabur tendak Amungnü ta süra Aor sobaliba nung aji anogo tamajung. Keyi agi nguset tzü nung arakset, mi agi rongset yimer ajak anogo terok amung amungtsü menen mung koba dang mungtem mungtsü ta ajar. Lijabamung, Denden mung ta süra aji putir tekülem anogo koba dang amungtsümung ta ajar. Ano moatsümung, Tsüngrem mung ta süra benjung bentsü anogo. Aor ya Israel nunger ama anogo terok mapa inyaker tenetnübuba anisüngzükmung munga maru. Küm piyong kenü ama dang anisungzükmung lemteta maka kasa. Anungji Clarki anogo terok mapa inyaker tenetnübuba anisungzüka amungtsü ta ashibaji tesama tulu ta bilema aikati mamang ta ashir. Iba yagi sayur ASLB-i amungnü ta ajabaji tetezü maka mapet aser Aor sobaliba-a aruba nung mali.
2016 küm zülutepdang nibo hopta (week) dang ya tenetnüzüng ta ajatsüla aser Calendar dang ya yinüzüng ta ajatsüla ta zülu. Iba nung O semloka P.Alem Jamiri aji junger ta zülu. Saka ASLB-i zonizüng ta amshir. Onokibo ita aser anogo dangbo zoni ta majar. Calendar English Dictionary nung tetezü “list showing the year divided into months weeks days etc” ta-ang lir. Saka anü (Sun) indang shia mali. Aori tatsüba nung ita dang yi ta anogo dang nü ta ajar jamijayi Chisemiyi moatsüyi J.P.Mills The Ao Nagas kaket page 401 nunga yamajiang lir. Ano anogo dang nü tananü , tasemnü ta dang ajar. Anungji ita anogo züngdangba yinüzüng (Calendar nungja) ano ita yabo tsüngküm mongpu den apet geography season den putepa nüngja asütsüla. ASLB- February ita Tsükla ita ta lir. Saka iba ita ya winter shilem nungang lir, ano Aori March, April ita dangang tsükla ita ta tsükla mapang ta ajar. Anungji Aor inti longjemer item nüngja ken tanaben meyipa reprangshitsüla aji mesüra tarutsü lanurtemi aitsütsü asüba agi ajak ajangzüktsü mechi zülur.
Tarem nung pai züluba Aolisanger asoshi Literature Committee ka dang asütsüla ta zülubaji nonga asür ABAMji balaka aji merasar. ASLB ya tajungba küma yanglushitsüla. Board member ajak Ao sendeni dang shimtsüla. Tang system yabo küra pa küp nung pa aso ama parnoksasa parnoki shimer Ao senden nem approve südaktsür ya kenyongi tai. Ita anogo nüngja yabo sobalibaren asünung ASLB nem tashi ajakbo magütsütsüla. Ano parnoki inyakbaji tapi agi Ao sendeni jungjunga luden takang kati check mesüi approve masütsüla. Tamalen SHISA JEN Kaket Aor aikati complain sür Ao sendeni caseji agizüka ayuba ajia tanü tashi yuba sür lir. Ao senden term küm asem dang ASLB term küm pungu asüba yagia mapa merinemdang Ao senden term atemer. Arok ajungtsü kati ka maitsütepi item ya ken repranshitsüla ta shisa lemsateper.