Hopta tsüngda Delhi nung tetsür 5 tashi raksatsüogo

New Delhi, December 13 (Agencies): Linük nung temzüng ozüng alema inyakertem junga azüoktetba nung linük yimtiba, Delhi ya tatishitsü tajung agiba yimti ka asütsüla, ajisüaka tan hopta tsüngda kija nunga Delhi nung tajemba agi tetsür pongu tashi tashiyim amshia raksatsüogo.
Dec. 11 nü Delhi yimti tesem balala nung tashiyim amshia tetsür raksatsüba ken o asem liasü. Tetsür tanur asem par kinüngertemi tashiyim amshia raksatsü, parnok rongnung tetsür anabo pei tebutemi raksatsü, ta police-i ashi.
Northwest Delhi, Bhalswa Dairy tesem nung arishi küm tenet tetsür chanu ka tebui aiben tashiyim amashia raksatsü. Honibar nü tetsürla jagi la tepok ashir ta ashiba sülen la medical tetendangba agidang ibaji jungkai adoka liasü, ta police-i ashi.
Tesülen lai tatalokba ajakji tetsü dang ashiba sülen tetsüi police ajuru. Arishi küm 40 tebuji puogo aser tetsürla nemji melungtet telok kati counseling agütsüogo, ta police-isa ashi.
Ano Delhi, Paharganj tesem nung aliba hotel ka nung arishi küm 12 tetsür ka tebui tashiyim amshia raksatsü. Lar kibongji Bihar nungi aruba sülen hotel ka nung anena liasü, aser Honibar nü kinüngtsü malidang pai par jalaji raksatsü. Tesülen tebuji puogo, ta police-i ashi.
Ano tanga tatalokba ka nung arishi küm 12 tetsür ka par kinünger kati aiben tashiyim amshia raksatsüogo. Tetsürla jagi la tepoklang ashir ta ashiba sülen la hospital kati anir oa tendangba mapang la tashiyim amshia raksatsübaji jungkai adok aser arishi küm 26 tebursangji puogo, ta police-i ashi.
Maneni tatalokba balaka nung December 12 nü South Delhi, Tigri tesem nung tebur asemi arishi küm tenet tetsür chanu ka tashiyim amshia raksatsü. Iba sülen tanutsülaji AIIMS-i anir oa mungdar. Tebur asem rongnung kabo puogo, aser paji arishi küm 18 tekübok lir.
Ano Brihostibar anepdang arishi küm 14 tetsür ka school-i aoba mapang lanur troki la apuba sülen tashiyim amshia raksatsü. Tetsürlar ki anasa teburtem jagi la gari ka nung atsüket aser southwest Delhi anasa aliba Dichaon yimtsüng nung tashiyim amshia raksatsü. Iba tatalokbaji kari ngua police nem osang agütsüba sülen tebur trokpronglaji puogo.
Delhi ya linük nung tashiyim amshia raksatsüba yimtiba ‘rape capital’ taka ajar. 2013 küm tashiyim amshia tetsür raksatsüba ken o 1,441 liasü aser 2014 küm ken o 1,813 liasü.