Hornbill Benjung mamung tajungba

Nagaland nung benjungtem rongnung benjungtiba ta ajaba Hornbill Benjung, December 1 nungi mungyonga arur tanü tembanger. Nagaland State anguba anogomung den repsema iba benjung amungtsü lemtetba sülen joko küm aika state sorkari iba benjung ayongzüka mungyonga arudar. Alima nem asen state metetdaktsütsü aser asen sobaliba takar sayutsü atema ta tenüng amer sorkari iba benjungmung nung sen aser nübo aika endoker, saka tajangzükbo balaka mangur aser sorkaria iba dak sendakba osang yimjak nung balaka memetetdaktsür. Shitak agibo, kümshia benjung temer külen state sorkari nübortem dang Hornbill Benjung nung sen endokba aser aruba osang tejangja metetdaktsütsü tim sürnung sorkari ibaji meinyaker. Kisama nung nisung adenshiba mesüra raliwalirtemi aruba mesüra shilem agirtem indang osang amala kar metetdaktsüba dak alaka senotsü dak sendakba osang tejangja memetdaktsür. Tanga telok kari ayongzüka agir ka süra, ibajibo par telok mulung saka tayongerji Nagaland state sorkar asünung, aser senji Chief Minister-i anir MLA temi tenla agütsütepba endoker masü asünung, sorkari nübortem dang senotsü dak sendakba osang tejangja metetdaktsütsüla, kechiyong iba benjung nung endokba senji nübor meyong lir. Sorkari Hornbill Benjung nung shilem agir nem taa agütsüba, ainertem mesüba nung sen endokba amala mesüra iba benjung ajanga sorkar senpongi sen aitba indang osangtem tejangja metetdaktsütsüla sürnung memetetdaktsür. Küm shia sen-sa sen endoka benjung amungba dang nungibo, tagitsü mapa kar ang inyakba tajungba asütsü. Raliwalirtem atsür arutsü atema ta ser benjungbo ayonga amunger saka parnok anenzüktsüsa semtu tajungtem balaka mali, gari lenmang nungbo tesenzü majung, parnok anisüngzüka kazüdak tesemtem tajung mali, süra iba benjung ya mamung ang tajungba ama bilemer. Taküm küm tenzükli nungi telok balalai state sorkar anema lungkak aitba sentongtem agiyonga aruba asenoki angashiogo. Mapang shitak nung itasen magütsüba atema telok aikati lungkak aitogo aser aiben sorkari state senpong nung sen maliba ajanga mesüra Centre nungi sen maruba ajanga itasen magütsüteter ta-sa kuli agütsüogo. Ano, nübortem atema inyakba mulungtet teloktemi Nagaland nung gari lenmang tia majungba atema aiben osangkaket balala nung sangdongtem agütsüogo aser item mapang nunga sorkari sen maliba ajanga meinyaktetba kulitem agüja liasü. Ajisüaka, tan itabo anogo 10 tashi senotsü agi manüngi dang Hornbill benjung amungba angudang, state sorkara sen ya kong yua aliba kakteta amshir mesüra shiri agütsü ta tasüngdangba arur. Sorkari sen paika ya rizünga liasü süra, kechiba itasen mangu timtemertem tu meyari ? mesüra, kechiba gari lenmang nung ongkentem aliba ya atepyonga mao ? ta terataba ka arur. Hao, Nagaland nung kin temeyoktep aika aliba aser asen sobaliba takar ya alima dang sayutsübaji kanga dang tim aser iba asoshi mapa inyaktsüla. Asen sobaliba kümzüka ayuba dang masü saka tangar nema asen sobaliba ajizükdaktsütsüsa asenoki mapa inyaktsüla, saka amajok nung sen endoka benjungtepba agibo iba alizüngji metongtettsü. Küm ishika tejaklen state sorkari ‘Road Show’ ta ser district ajak sema senzüba sentong ka tenzük saka nübortemi junga magizükba ajanga anenadok. Iba kasaji Hornbill Benjung ya-a anentsüla aser state sorkari alima nem Nagaland metetdaktsütsü atema mapa inyaknüra, Naga nunger kin 17 indang benjungmung nung sorkari kin shia den yaritepa ayongzüka, par mapang nung benjungtem amung tajungba südisü ta bilemer. Taküm Dimapur nung kenten sentong agiba dak alaka Hornbill Benjung yabo Naga Heritage Village ta ajaba Kisama aser state yimtiba Kohima nungdang amunger. Ajisüaka, kodang sorkari Naga nunger kin 17 indang benjungtem ajungkettsü atema mapa inyakdir, Nagaland kübok district ajunga nung, mapang balala nung, benjungtem ayongzüka amungtsüsa akümtsü aser iba jagiang raliwalirtem küm piyong Nagaland semdangi aruli-oli ta senzüteptsü aser idangjiang asen sobaliba takar ya alima dang tajungba aser tali terajemba nung sayutettsü.