Hornbill benjung nung adener ajak agi nisung lakh 1.12 liasü

Kohima, December 11 (TYO) : Honibar nikongtsütsü Naga Heritage Village nung tourist tem dena nisung meyirjang aikati “Unity Dance” nung shilem agia Hornbill Festival benjung tembangogo.
Iba sentong nung Nagaland Angh, P B Acharya den pa kinungtsü Kavita Acharya na aser Chief Minister TR Zeliang o pa kinungtsü nungertem den cabinet minister tem, MLA tem aser tongti ketdangsertem aika aden.
Benjung tembangba o jembidang, T.R Zeliang-i sobaliba sentong nung shilem agirtem ajak dang pelaba metetdaktsü aser iba ya Hornbill benjung nung tongtiba lir, ta paisa shisem.
Sentong nung Miss Nagaland, Vilokali Zhimomi-i mi aputet aser iba sülen ‘unity dance’ liasü aser Christmas kentenba mapang nung Nagaland nungi aser tangalen nungi arur kentener balalai shilem agi.
Tourism Parliamentary Secretary, C Apok Jamir-ia yartsüngsanger teloktem, government department tem aser tesemdanger ajak dang pelaba metetdaktsü.
Paisa, Synergy Group Enterprise ajanga ayongzüka agiba Naga Chef nung takok angur nem sempettem lema agütsü. Naga Chef Season 4 nung Wokha district nungi Renphamo Ezung-i tematiba takok angu. Iba tetoktepya Tourism Department-ia teyari agüja nungiter.
Hornbill benjung nung tesemdanger ajak agi nisung 1,12,604 lir. Parnok rongnung foreign tourists 1,646, domestic 14,962 aser locals 95,996 liasü, Tourism Department nung Tourist Officer, Toka E. Tuccumi-i ashi.
Taküm benjungmung nisung teimba adenshiba anogoji taoba Deobarnü liasü. Iba anogo nung nisung 32,343 aru aser parnok rongnung foreign tourists 122, domestic 2221 aser locals 30,000 liasü, ta paisa metetdaktsü.