Hornbill benjung ya Northeast nung sobaliba sentong tulutiba lir: Mizoram Angh Kummanam

Kohima, Luchii/December 06 (TYO): Tanü Mizoram Angh, Kummanam Rajasekhar-i, Nagaland nung Hornbill benjung ya North East tesem nung sobaliba sentong tulutiba lir, ta metetdaktsü.
Naga Heritage Village, Kisama nung tanü agi anogo troknübuba sobaliba sentong nung lokti den jembidang Mizoram Angh-i, iba benjungmong mission ya Naga nunger takar sobaliba asentenshitsü, kümzüka ayutsü aser maneni benshia wazüka ayutsü atema lir, ta ashi.
Kin balalai sentsü tapu balala nung sopur sobaliba yar tsüngsang, kentenmenü aser saisapong balala asayaba ya akümli nung kanga jungsa ajangshibatem rongnung ka asütsü, ta shia pai, linük nung tanga tesemtem nung Naga nunger sobaliba ajungkettsütsü atema sobaliba yar tsüngsang, sobaliba saisapong aser kentenmenüji lenmang tajung ka asutsü, ta metetdaktsü.
Paisa, süngkong tema benjungtepba, sentsü aika aketba tekolak sobutsü aser sobaliba sobutsü balalaji tesüngmangtsüka, aser jangratemtsüka, ta ashi.
“Iba benjung ya Nagaland nung alirtem atema dang masü ajisüaka NE state nüburtem aser linük tesem balala den bendang lima balala nungi raliwalirtemi sobaliba balala kulisüa reprangtsü atema sabang ka kümogo,” ta Angh-isa metetdaktsü.
Tanü Naga kin 17 nungi sobaliba telok balalai tesemdangertem jangratemdakja liasü.
Sobaliba sentong dak alia tanü iba anogomong nung World War-II rally, Sumi Naga nunger sobaliba kick fight – Akikiti aser Naga ornaments workshop agiogo.
Hornbill benjungmong ya state sorkari tourism ajungkettsütsü atema kümshia agiba sentong ka lir, aser iba sentong ya Tourism Department-i ayongzüka agir.
Naga Heritage Village, Kisama nung Hornbill benjungmong mezüngbuba anogo pongu nung tesemdangertem nisung 97,551 liasü, item rongnung bendang linük balala nungi arur 1705, linük tesem balala nungi arur 15,325 aser lisopur 80,521 liasü.
Mezünguba anogo pongu nung tanünübuba- Deobar anogo nung tesemdanger timtiba, nisung 43,079 aru aser tesemdanger ishitiba aruba anogoji pezünübuba nung tesemdanger 11,416 liasü.