Hornbill Festival atema Kohima nung senden ayonga amen

Kohima, November 01 (TYO): Hornbill Festival 2017 atema renemshiba dak sendakba nung o lemteptsü atema November 1, 2017 nü DC’s Conference hall, Kohima nung rongdak senden ka ayongzüka menogo, ta tanü ketdangsertem osang ka ajanga metetdaktsü.
DC Kohima, Rajesh Soundararajan IAS-i, iba senden ya Hornbill festival atema renemba maparen aser mapalem atema o lemteptsü aser ketdangsertem dang nungi tebilemba onüktem asüngdanga jembitsü atema ayongzük, ta metetdaktsü.
Senden nungsa gari lenmang anepluba, power supply, POS Machine/ATM aser stalls atema jembi, aser iba mapang nung tim ketdangsertemi iba benjung takok ngua akatsü atema nüngdakba ajak achaayanga agütsütsü nangzük.
Traffic aser security tebilemtsü dak sendakba nung Senior SP, Kohima Joseph Hesso-i police aser sepaitem dang amalitepa inyaktsü mepishiba den külemi, tesem balala nung nüngdak apir security lemzüktsütsü, ta ashi.
Paisa Phesama aser Kigwema nungi lenirtem dang iba benjungmong mapang mepetmesü adokra iba mapang nung police den yariteptsü atema volunteers agütsütsü mepishi.
Bendanglen nungi arur raliwalirtem atema nüngdak, ta apiteta DC-i Kisama nung ‘KFC’ ka lapoktsü ta metetdaktsü, aser iba atemaji tim department-i inyaktsü mepishia metetdaktsü.
DC-isa Kohima Municipal Council danga kiyong balala dang nübodoka mapa inyaktsü tuyuang ta metetdaktsü.
Iba dak sendakba nung KMC administrator, Kethosituo Sekhose-i, ward, colony mesüra dokan temerüktiba tem nem Hornbill benjung mapang nung sempet agütsütsü ta sangdonga lir, ta metetdakja liasü.