Hornbill Festival : Samrat Sengupta-i HIPFEST 2016 akok

Apon Nath-i chuba mersü timba achi

Dimapur, December 10 (TYO): Hornbill International Photo Fest 2016 December 10 nü tembangogo.
Iba tetoktepba nung Samrat Sengupta (Assam)-i mezüng jenjang sen 35,000, Diti Mero-i tanabuba jenjang sen 20,000 aser Heutinggumbe Ndang-i tasembuba jenjang sen 10,000 senpetettem angu.
Shanthungo Ezung aser Vichusiezo Livi-nati consolation sempet angu aser tena nem sen 5000 senpettem agütsü. Maneni, Bitu Chetia (Assam) aser Diti Mero-na Best Afford category nung Digital to Home aser Pro Colour Lab sempettem agütsü.
Hipfest ya küm shia aliba noksa tangoktepba tetoktepba sentong ka lir aser taküm ‘Colours of Nagaland’ onük nung ajemdaker agi. Iba tetoktepba nung tetendangertemji Thailand nungi noksa kanga junga agir Tom Potisit aser Natwalee Aengsubwong (Linje) na liasü. Tetendangertemi noksa ajanga kechi otsü sayur mesüra ashir, iba nungji kanga süoki-ia tendanga liasü.
Tanü sentong nung Secretary Tourism, Angau I ajanga sempettem lema agütsü. Iba sentong nung tongti süa acha-ayanger Ababe Ezung ajanga ashiba agi, taküm iba tetoktepba nung India tesem balala nungi arua shilem agir dena nisung 40 liasü aser taküm tetokteper timba liasü.
Hipfest nung Naga nunger nüngtugu noksa tangoker Rokovor Vihienuo, M. Shanthung Ezung, Freelance Photographer aser Dimapur Photography Club nunger-i agiba noksatem sayua liasü.
Iba sentong ya Eastern Art Council ajanga ayongzüka liasü aser Tourism Department, Government of Nagaland ajanga sponsor asü.
Chuba mersü achiba tetoktepba
Hornbill benjung nung kanga saputepa aser yongyaseta ataba, Chuba mersü achiba tetoktepba tanü agi. Iba tetoktepba nung Apon Nath-i mezüng jenjang, Nesakho Tetso-i tanabuba aser Alung Kamei-i tasembuba jenjang takoktem angu.
Takoker nem sen 15,000, 10,000 aser 5000 senpettem den kulikakettem agüja liasü.
Takum iba tetoktepba nung shilem agir ajak agi nisung 46 liasü aser parnok rongnung Naga nunger dang masü saka bendanglen nungia arua shilem agia liasü.
Tetsür rongnung Ngahboi Kiki-i mezüngbuba jenjang aser Meghana Sharma-i tanabuba jenjang takoktem angu. Rali-walir nungi Captain Ram aser Isham nati mezüng aser tanabuba jenjang ngua liasü.
Iba tetoktepba ya Department of Horticulture aser Tourism Department nati külemi ayongzüka agi.
Hornbill Kids Carnival
Naga Heritage village, Kisama nung anogo 10 nü amungba Hornbill kids carnival kanga takok ngua tembangogo. Iba sentong nung hopta tatem mapang nisung 10,000 shi aser tanga anogotem nung nisung 1000 shi sa arua dena liasü.
Carnival nung games aser activity balala asayaa aser agia liasü. Iba den külemi essay züluba, ken tentepba, noksa yanglutepba aser fancy dress tetoktepbatem agia liasü.
Carnival tatembangnü Chakhesang Baptist Church, Choto Bosti-i praise and worship sentong agi aser iba sentong tembanga bonfire ka tsülok.
Kids carnival ya Synergy Group Enterprise den lokteper Mutukuve Events-i ayong. Iba sentong tajung ya pelateptsü atema tang masü saka tanurtem nem tangazükba aser shisa tasen agütsütsü nükjidong nung ayonga agia liasü.