Hornbill Festival tembangogo; nisung lakh 2.34-i semdang

Kohima, Dec. 10 (TYO): Brishostibar nü Kisama nung anogo 10 nü Hornbill Festival tatembangbuba aonung bendang linüktem nungi raliwalirtem densema mi tulu apur ibaji meketa tsüngsanga tembangogo.
Taküm Hornbill Benjungmung tesem semdanger nisung lakh 2.24 tashi liasü.
Tatembangbuba sentong nung tongti tejaoker Nagaland Parliamentary Secy. for Tourism, C Apok Jamir-i, benjungmung kanga tesünep nung katetba aser mepetmesü tatalokba kecha maliba atema pelar, ta ashi.
Iba benjung nükjidong tongtibangtibaji Naga nunger sobaliba takar sayatsü atema lir, ano tanga nükjidongji tourism ajanga state atema sen ajangzüktsü asoshi lir, ta pai ashi.
Iba benjungmung ya benjungteptsü aser sobaliba takar sayatsü atema dang masü saka alima tatsükba akumba kulitem nüburtem nem metetdaktsütsü aser süngdonglidong wazüka ayutsü asoshi lir. Hornbill festival tesem Kisama nung taküm atema omenji “No Plastic Zone” ta sangdong, ta paisa ashi.
“Linük aser bendanglen nungi raliwalirtem aikati semdangba ajanga iba Hornbill benjungmung takok tulu ngutetogo, kechiyong parnok medenibo Hornbill benjungmung ya tetezü meketla,” ta Apok Jamir-i ashi.
Paisa department balala, hoho tem, anasa aliba yimtsüngtem densema stall lapoker ajak dang pelaba metetdaktsü.
Parliamentary Secy-i sobaliba telok balalai shilem agiba ajanga benjung meraketa takok ngudaktsüba atema parnok danga pelaba shisem.
Taküm iba benjungmung tesem semdanger nisung 2,43,111 liasü. Bendang linük balala nungi raliwalir 1133, linük nungi raliwalir 19969 aser lisopur 2,22,000 liasü. Taküm küm tesemdanger talila 70,709 liasü.
Dec. 6, Deobar nü tesemdanger timtiba, 43,753 liasü aser Dec. 3, Brihostibar nü tesemdangger ishitiba 13,904 liasü.
Hornbill Festival ya Nagaland aser Assam Angh, PB Acharya-i December 1 nü tenzükja liasü. Taküm Music Task-i Hornbill International Music Festival ayonga Hornbill Rock Contest kaogo, iba den külemi International band- Germany nungi Helloween aser Sweden nungi Abba tribute band, Arrival kenten sentong-a kaogo.
Tatembangbuba sentong tenzüka Bethel Masiha Church Sannüker, Sankara Narayan-i sarasadem, Colored Keys aser Dreamz Unlimited teloki ken aten aser tetoktepba balala nung takok angurtem nem Apok Jamir-i Award lemshia agütsü aser Tourism Secretary, Angau I Thou-i anküp o jembia liasü.