Hornbill International Rock Contest 2016 nung SNF-i takok nguogo

Dimapur, December 10 (TYO) : Hokolbarnü IG Stadium, Kohima nung Hornbill International Rock Contest 2016 final tetoktepba nung Nagaland nungi SNF band-i takok nguogo.
Tan Hornbill International Rock Contest final toktepba nung kentener telok 9-i shilem agi aser Nagaland nungi SNF band-i takok angu. Iba tetoktepba nung Nagaland nungi band temi küm trok tashi takok munguteti aliba tan mezüngsüa SNF teloki takok nguogo.
Tetoktepba nung takok angur nem sen lakh 10 senpet agütsü. Parnok sülen Sikkim nungi Crystal and the Witches teloki tanabuba jenjang nung takok ngua sen lakh 2 senpet agizük aser tasembuba jenjang nung takok angur, Mizoram nungi The Prophets telok nema sen lakh 1 senpet agütsü.
Hornbill International Rock Contest 2016 nung shilem agir kentener telok ajak agi 20 liasü. Taküm iba tetoktepba nung Nagaland nungia telok 4-i shilem agi.
Final tongteter tanüngba teloktemji Mount Groove (Darjeeling), A Touch of Madness (Nagaland), Anti-Trust (Nagaland), Ambush(Assam), Soul Bucket (Nagaland) aser I Am We (Kolkata) teloktem liasü.
Tetoktepba nung The Prophets telok nungi kentensangi best vocalist, SNF nungi best guitarist, Crystal and the Witches nungi best drummer aser Mount Groove nungi best bassist sempettem angu.
Iba sentong nung tetendangertemji Rudy Wallang, Luke Kenny aser Atsung Jamir nunger liasü.
Hornbill International Music Festival ya Symphony Academy of Music Kohima, Life Pro, Metal Gear, Innovation aser Kemp Designs den lokteper Little Fire Productions-i produce asü.