Hornbill International Rock Contest atema ‘audition’ agiogo

RCEMPA, Jotsoma, October 17: Sunep Ensemble Band, Dimapur, HIRC 2015 State audition mapang shilem agiba noksa nung angur.

Kohima, October 17 (Agencies): Honibar, October 17 nü Regional Centre of Excellence for Music & Performing Arts (RCEMPA), Jotsoma nung Hornbill International Rock Contest (HIRC), 2015 atema state audition agiogo.
Audition mapang kentener telok ajak agi ter ser ka tashi arua aden saka parnok rongnungi telok pongu ang shimtetaogo aser teshimtetertem December mezüng hopta nung akatsü aliba HIRC tetoktepba nung shilem agitsü.
Yashi shimtetertemji The Gluttones (Dimapur), Tune Up Channel (Mokokchung), Monkey Fingers (Kohima), Sunep Ensemble Band (Dimapur) aser Rune Legacy (Dimapur) kentener teloktem lir.
Ajisüaka sentong ayongertemi ashiba agi, HIRC 2015 nung Nagaland nungi kentener telok aika shilem agidaktsütsü meji ‘wild card’ amshitsü.
Audition nung adener tanüngba teloktemji Avancer (Dimapur), Candlelight (Kohima), Zion (Kohima), Digital Junkie (Kohima), Vibrant Illusion (Kohima) aser 4 O’clock Inception (Medziphema) nunger liasü.
Iba audition nung tetendangertemji Thejove Medeo (guitarist Tribal Instinct), Abemo Enyie (bassist Tribal Instinct) aser Andrew Ngullie, (bassist Scarlet Idol) nunger liasü. Parnok asemprongla ya par tensa nung music tsütsü ajaki meteta kanga nüngutugu süa aliba nisungtem lir.
Par asemi ashiba agi, taküm audition ya tesüiba kümtem dang nungi kanga agi tajungba lir.
“Kangsa melenshiogo. Ken tsütsü aser shilem agiba yimya ajak nung kanga junga melenshiogo,” ta taoba HIRC nunga tetendanger asüsang Abemo Enyie-i ashi.
Andrew Ngullie-i, “State nung aliba kentenertem nem Hornbill International Rock Contest ajanga sabang lapkoktsüba asoshi Music Task Force (MTF) dang kanga pelar. Linük nung Nagaland ya ken tsütsü tesepti ka akümtsü ana nung lir. Ken (Music) ta kodang südir, India nunger ajaki Nagaland dak rangloker,” ta ashi.
Hornbill International Music Festival 2015, convenor Thepfühulie Belho-i, International band tarensen nungi Melbourne, Australia nungia kentener telok ka tenüng aitogo, ta ashi.
Kasa tetoktepba nung adentsü asoshi India nungia telok ana shi-i tenüng agüja lir ta angashiogo.
Taküm iba teteoktepba nung takok angurtem nem sen lakh 10, tanabuba jenjang nem sen lakh 5 aser tasembuba jenjang nem sen lakh 2.5 senpet angutsütsü renema lir.
Best vocalist, best guitarist, best keyboardist, best drummer aser best bassist tem nema sen masü saka senpet tajung agütsütsü renema lir.
Helloween aser ABBA teloktemi shilem agiba reprangtsü aoshi ticket online nung www.ticketgenie.in ajanga alitsü lapoktsüogo.
Hornbill International Music Festival 2015 ya Music Task Force (MTF), Government of Nagaland den Pepsi MTV Indies aser Northeast Today nunger lokteper ayongerba lir. Iba sentong Sky Entertainment aser Nagaland Outdoors’ Club (NOC) nati acha ayangtsü.