Hornbill International Rock Contest atema band 24 shimtetogo

Kohima, Yimpoksüi/Nov. 15 (TYO): Nagaland nung International Hornbill Festival nung shilem ka ama Music Task Force (MTF) ajanga ayongba Hornbill International Rock Contest 2018 nung linük tesem balala nungi band 20 aser state nungi band pezü-i shilem agitsü.
Iba contest ya anogo ter Hornbill International Music Festival (HIMF) nung shilem ka asütsü aser Agri Expo, Dimapur nung kümanabuba atonga akatsü. 2004 nungi 2016 tashi iba kenten bejong ya Kohima nungsa agia aru, saka taoba küm nungi iba Hornbill benjongmung tali uludaktsütsü nükjidong nung kenten benjong ya Dimapur-i belen. Iba sentong ya LiveNow Events ajanga ketdangsütsü.
RCEMPA Hall nung Nagaland Audition metenzük tsüngta osangbener senden ka nung jembiba mapang, HIMF ya Dimapir nung maneni agitsü aser meilungi tanga district tem nunga agitsü sorkari lemtetogo, ta Music Task Force (MTF) Consultant, Gugs Chishi, LiveNow Director Atsung Jamir, Artist Manager Lima Mongro aser Media coordinator Kallol Dey nungertemi ashi.
HIRC ya Luchii/December 5 nungi 8, 2018 tashi alitsü, kong linük tesem balala nungi band 23-i shilem agitsü, aser iba benjong nung international band tem nungi registration agitsü asoshi mapang hopta ka tali lapoktsür, ta Chishi-i metetdaktsü.
Paisa ashiba agi, HIMF mezüng anogo ya state nungi kenten sempet sayutsü mechi Naga Musicians Day asütsü aser iba anogo District Mini Hornbill Rock contest nung takokertem alitsü, tanünü ya Amungnü asünung iba anogo ya Christian Musician tem asoshi asütsü, asemnübuba ya Great Hornbill Guitar Jamboree, pezünübuba ya Nagaland Artists, tekonübuba ya Country & Blues aser ternübuba ya Electronic Dance Music (EDM) asütsü.
Hornbill International Rock Contest nung takok angur nem senpet ya taoba mapang ama mezüng jenjang nguteter nem senpet sen lakh 10, tanabuba jenjang nem senpet sen lakh 5 aser asembuba jenjang nguteter nem senpet sen lakh 3.5 agütsütsü, ta Gugs-i ashi.
Tanünü ya Prayer Sunday asünung, iba anogo ticket ayokba nungi aruba sen ya ‘Hornbill Gives Back’ ama charity work atema amshitsü, ta LiveNow Director Atsung-i ashi. Iba anogo Khristan ken atener tejangja nisungtemi shilem agitsü.
HIRC atena Nagaland Audition ya tanü agia liasü, kong state tesem balala nungi band 10-i on-spot registration agia liasü. Iba audition nung tetendangertem ya Mhaseve Tetseo, Theja Meru, Fung Walling aser Kevi Neibulie Kiso nungertem liasü.
State nungi band pezü shimtetertem ya UDX Dimapur, Since 90’s Dimapur, Yellow beacon Dimapur aser Switchblade, Kohima nungertem alitsü.
Linük tesem balala nungi band 20 ya Moongphali, Vishnu, Snuffer, Skvi, Perfect strangers, Her Illegal Practice, Vikrit, Tripp Pilots, Kroashia, Meraki, Granite yard, Ambush, Tyrrhenian, Lost Icons, Rongbin The Secret Realm, Quiet Battle, Looking Glass, Existence, Pralaya aser Highway 69 nungertem alitsü.