Hornbill: Kisama nung sobaliba tsüngsang balala ajanga shilem agi

Kisama, Luchii/December 02 (TYO): December 2, 2018 nü North East Zone Cultural Centre (NEZCC), National Dance & Music Day, Kisama nung state balala nungi shilem agirtemi sobaliba yar tsüngsang balala ajanga ainertem aser lisopurtem jangratemdaktsüogo; nikongdang sentong nung host ji Deputy Speaker, Zhaleo Rio aser Advisor, Youth Resource & Sports, Zhale Neikha na liasü.
Iba sentong tenzüka Odisha nungi sobaliba telok kati Dalkhai tsüngsang ajanga shilem agui; iba tsüngsang ya full moon sülen anogo 8nübuba aonung aiür chanutemi tsüngsanger aser iba tsüngsang ajanga yimdaklirtem libaliro aser air chanutem tebor ajungba shisangdaktsür.
Iba sülen Assam nungi Mishing nungeri Gumrag tsüngsang ajanga shilem agi; iba ya Ali Ai Ligang mesüra spring dance festival ka lir aser iba tsüngsang ajanga metsüh prokba mongpu temaitsü sayur.
Maneni Madhya Pradesh nungi Ahir nungeri Baredi tsüngsang ajanga shilem agi, iba tsüngsang ya aluruwa mapang nung Krishna tsüngrem nem tenüngsang agüja tsüngsangba tsüngsang ka lir.
Ano Manoour nungeri Thang-ta tsüngsang ajanga shilem agi. Noklangnok aser nü amshia tsüngsangba ya Manipur nunger martial art tsüngsang ka lir. Thang (nok) jagi temenen tanela aridoktsür aser ‘Ta’ tetezü sarir ka kümzüktsü atema nokdakbayim lir.
Ano Meghalaya nungeri Wangala tsüngsang ajanga shilem agi; iba ya Garo nunger tsüngsang lir aser Wangala benjung mapang nung parnoki iba yar tsüngsanger, iba denji külemi kiyimla mesüra kiyimer shimba mapang nunga tsüngsanger.
Maneni Chhattisgarh nungeri Panthi Nritya tsüngsang ajanga shilem agi; iba tsüngsang ya Satnamis nungeri Guru Ghasidas nüngsanga tsüngsangba tsüngsang ka lir.
Manipur nungi Cheirol Jagoi tsüngsang ajanga shilem agi aser parnoki süng tapu balala asem amer kanga keraa tsüngsanga liasü.
Maneni Jammu & Kashmir nungi sobaliba teloki Rouf tsüngsang ajanga shilem agi, aser iba tsüngsang ya aluruba mapang nung tetsürtemi dang tsüngsanger.