Horror film dak alaka tangabo onsara kümogo:Bipasha

October 27, 2015: Tan mezüng süa TV sentong “Darr Sabko Lagta Hai” nung shilem agitsü alila, actress Bipasha Basu-i, “Asenoki horror film aser TV sentong tem ajungketba nung yaritsüla kechiba süra India nung tanga otsü indang film tem onsara kümogo,” ta ashi.

“Kü nem nüburtemi ‘queen of fear’ aser ‘horror queen’ tenüng jalokja lir aser ni item tenüng agubaji kanga tia taka lir kechiba süra Hindi film nung shilem agir shinga ni ama horror film tem nung shilem agitsüsa maongka mangu,” ta Bipasha-i IANS dang ashi.

“Ni tang ata-a aliba sentong agi kanga temulung asür kechiba süra tanga otsübo onsara kümogo. Tan ni shilem agiba sentong ya mesüka tanga sentong ano aikabo mali,” ta lai shisem.

India nung horror film agizükteter asü ? ta asüngdangdang, “Raaz”, “Darna Zaroori Hai” aser “Aatma” horror film tem nung shilem agila, Bipasha-i, “Asenoki telok timba aoleni dang oner. Business nung balaka, tangari atetapongtsüsa mesüra mesaputsüsa meinyaker. Ajisüaka asenok iba tebilemba nungi adoktsüla. Anungji horror ajungkettsü asoshi ni TV nung horror otsü nung shilem agitsü telemtetba agi. Asenoki horror otsütema nungittsüla. Director temi parnok dak iba sempet aliba sayuner,” ta langzüa liasü.

Kechiba TV nung shilem agitsü mulungtet, ta asüngdangba nung, lai, “TV ya sabang tulu aser onoki tesüiba küm pongu tashi sentong balala agitsü bilemdanga aser jembia aruogo. Kü nem maongka aika lapoktsüa liasü, ajisüaka ni mezüng TV sentong asoshi koba shimtsü ta shisadangba ajanga mapang talangka agi. Tangbo TV nung shilem agirtem aika kanga takok ngua inyaker. Ni film nung shilem agitsü tenzüker küm 14 buba lir aser ni kanga jangratema inyaker. Ni nüburtem nem mapa balaka ajanga tayongzükba agütsüner aser ibaji ajanga ni iba sentong ya shimtet. India nung iba amala TV sentong tan mezüng asütsü,” ta lai langzü.

“Darr Sabko Lagta Hai” indang jembidang arishi küm 36, Bipasha-i “Iba channel yagi horror otsü jenjang balaka nung ajungkettsü kechiba süra item otsü tatsütsü ya director tasen aser tejangraba tulu alirtemi yangluba lir. Iba otsü ya ajanga tapu ajaklen nungi tsübuba sayutsü. India TV nung mongudangba aika iba otsü nung angutsü. Iba ya ni aginüba shilem ka lir,” ta ashi.

“Darr Sabko Lagta Hai” ya October 31 nü nungi TV nung yoktsü. Iba film nung director balalai yangluba film tatsütsü 26 lir.