Horti Advisor-i Herbal Soap manufacturing unit ka lapoktsü

Dimapur, Luchii/December 9 (TYO): Advisor for Horticulture and Border Affairs, Nagaland, Mhathung Yanthan-i tanü December 9 nü Wokha jila kübok Rachan Colony nung Tongphi Herbal Soap manufacturing unit ka lapoktsüogo.
Sentong nung o jembiba mapang Advisor-i, arishi küm kecha tebendang makai aluyimertem ajak horticulture department tembar lir, ta ashi. Paisa, aluyimba ya enterprise ama agia entrepreneur kaka akümtsü ajungshi. Yanthan-isa, srokar mapa bushitsü melena pei sasa ayanga chiyonga alitsü atema aluyimba wadang nung inyakyim tasen benoka bendanga agüja meranga inyaktsü ajungshi.
Sentong nungsa Director, Horticulture Dr. Elithung Lotha-i, Horticulture kübok lenla aika lir aser item ajak ya department-i anepalur aser iba atema item horticulture dak sendakba aluyimba ulushitsü nüngdaker, ta ashi. Paisa, aluyimertem ajak dang parnok mapa renloka aotsü atema inyakyim bentet benteta ayutsü ajungshi
Sentong tetenzük nung Mhathung-i nüngshilong sayatsü aser Longjung Baptist Church, Vankhosung pastor Rev. S. Thungrio Khuvung-i bendanga agüja sarasadem. Herbal Soap manufacturing unit lapokba sentong ya District Horticulture Officer, Wokha Medemshiba lenisüba kübok agi.
Sentong tembangba sülen Advisor den külemi ketdangsürtemi manufacturing unit asadang aser Lanchibemo Tsopoe aser par kibongi renemtsüba chi chiyonga liasü.