Horticulture Crops indang anogo 5 nü training tembangogo

Dimapur, June 23 (TYO): West Garo Hills, Meghalaya nung June 19 nungi June 23, 2017 nü tashi anogo pongunü aluyimertem Training sentong takok ngua tembangogo.
Iba training ya Snamrik Club, Tura (Megalaya) aser Central Institute of Horticulture (CIH), Medziphema nati senteper ayongzükba liasü.
Iba training nung yimtsüng balala nungi aluyimer 250 shi shilem agia aden.
Central Institute of Horticulture (CIH) Medziphema nungi Kr. Shisarenla-i Institute-i inyakba mapatem metetdaktsüba den külemi aluyimertem dang iba Institute-i agütsüba training course balala agitsü atema aluyimertem ayongzüka liasü.
Ano Nagaland nungisa Senti Longchar (DK), Horticulture Officer-i Naga Mircha (Raja Mircha) lu ayimba indang onük tasen ka jembia liasü.
ADO, Daddenggre (Hq), Apurba Hajong-i bengana, Capsicum tsünüba indang tasa aser titidong nungi süngsem agizüka metsüh yangluba tasatem (softwood grafting techniques) sayua liasü.
Ano Daddenggre C&RD Block nungisa shisalen sayur ka tenüng agi, Lunathone Marak-ia sobaliba süngjanglijangtem aser iba ajanga tajangzüktem indang jembi.
ADO Gasuapara C&RD Block, Walseng Sangma-i yimtsüngtem nung konger lu yima senotsü ajangzüktsü indang tesayuba agüja liasü.
Greatush M Marak, (M.Sc. Agri)-ia yimtsüngtem nung pei kima atsü lu ayimba indang jembia liasü.
Iba sentong tatembangbuba anogo nung shilem agir aluyimertem nem certificates lema agütsü aser Snamrik Club nungi Torang-i tepela anküp o jembia training takokma nung tembangogo.